A recuperación do espacio público, eixo das propostas de mobilidade coñecidas pola delegación de concellos da provincia de Pontevedra en Cataluña

O concello de Granollers foi o primeiro punto de parada da delegación pontevedresa. Alí foron recibidos os alcaldes, alcaldesas, concelleiros e concelleiras e persoal técnico de A Guarda, Cambados, Salceda de Caselas, Silleda, O Grove, Vilaboa, Vilagarcía, Ribadumia, Ponte Caldelas, e Valga. O alcalde Josep Mayoral destacou que para o seu equipo de goberno resultaba "unha honra" que a Deputación tivera escollido Granollers para coñecer o traballo feito, xa que a cidade de Pontevedra sempre foi unha referencia no ámbito da mobilidade. "Nós non somos Pontevedra. De feito copiamos algunhas cousas e a ver se algún día vos gañamos -bromeou-. O certo é que queremos unha cidade na que se poida vivir, falar, relacionarse... Facilitar a interacción social e a relación da cidade e a súa contorna. Queremos recuperar o espazo público e estamos a traballar no noso segundo Plan de Mobilidade", apuntou.

Segundo explicaron o alcalde e os concelleiros de Obras e Mobilidade, Albert Camps e Juanma Segovia, nos últimos anos realizouse un gran esforzo de remodelación do centro histórico, co incremento da extensión da ‘illa' de peóns, e coa mellora integral das zonas de ensanche que rodean ao devandito centro histórico, a segunda coroa urbana, ampliando os espazos verdes urbanos e de paseo e mellorando o deseño, accesibilidade e calidade dos espazos públicos.

Os concelleiros Camps e Segovia, pola súa banda, insistiron moito aos representantes municipais galegos en que debe haber determinación política para aplicar as medidas de recuperación e mellora das vilas: "As pautas políticas da cidade que queremos non se discuten. O modelo de cidade non se discute, e haino que aplicar tecnicamente con solucións solventes", subliñaron.

Terrassa e Sabadell
Pola súa parte, no Concello de Terrassa a delegación pontevedresa realizou dende 2003 un esforzo considerable cara a unha mellora da calidade de vida urbana a través da transformación progresiva do espazo público, á vez que se perseguiu modificar os hábitos de residentes ou persoas usuarias cara a unha mobilidade máis sustentable. O tenente de alcalde Marc Amengol sinalou que Terrassa foi o primeiro concello catalán en ter un Plan de Mobilidade Sustentable en Cataluña, cuestión que agora é obrigatoria pola Generalitat.

Pola súa banda, segundo explicou a directora do Servizo de Mobiliade, Susi López, o cambio a positivo das actuacións comprobouse pola tendencia sostida de transformación cara a modas máis aptas para os desprazamentos de curto percorrido (inferiores a 3 quilómetros), que realiza unha boa parte da poboación. O persoal técnico lembrou que Terrassa dispón dunhas condicións óptimas para desenvolver aínda máis estas potencialidades, grazas á orografía, climatoloxía e densidade urbana, e destacou que o obxectivo é reducir un 12% o uso do coche a curto prazo.

"Fai falta insistir na transformación da rede viaria para que aos poucos vaian gañando proporción aquelas tipoloxías de viario que promocionen os desprazamentos a pé, en bicicleta ou de transporte público, sen esquecer unha rede do vehículo motorizado máis optimizada e eficiente", aseguraron, tendo claro que para conseguir unha distribución do espazo público é preciso facer un maior esforzo para conseguir mellorar as redes de peóns e bicicletas facéndoas máis comprensibles, seguras e cómodas e espazosas.

Finalmente, a xornada rematou coa asistencia da delegación pontevedresa ao relatorio aberto á cidadanía do vicepresidente César Mosquera en Sabadell, onde xunto co concelleiro Demetrio Gómez e o xefe da policía local de Pontevedra, Daniel Macenlle, falou de ‘A cidade para as persoas' despois de varias reunións co persoal técnico municipal.