A veciñanza de Oia poderá comunicar incidencias ao Concello directamente desde o móbil

Esta ferramenta de participación cidadá ofrece un servizo rápido e sinxelo de usar para a cidadanía que, ao mesmo tempo, permite ao Concello coñecer as necesidades que existen no municipio e poder dar unha resposta o máis áxil posible.

Para empregar Línea Verde cómpre descargar a aplicación (gratis) no móbil ou tablet: a través de Google Play para dispositivos con sistema Android ou da APP Store para dispositivos con tecnoloxía iOS.

Funcionamento

Unha vez instalada a aplicación, a persoa usuaria deberá seleccionar o municipio de Oia, elixir "nova incidencia" e indicar que tipo de incidencia é entre as opcións que se presentan. De xeito automático, a aplicación detectará as coordenadas exactas do lugar no que se atopa o problema.

O seguintes pasos consisten en incluír unha fotografía e unha observación sobre a incidencia. Finalmente, o proceso quedará rematado pulsando a opción "enviar".

Unha vez enviada a incidencia, o persoal do Concello recibirá a notificación e comezará os trámites para solucionala. Cada vez que se produza un cambio no estado da incidencia, o cidadán recibirá a correspondente notificación.

Consulta medioambiental con resposta en 24 horas

A través desta aplicación o usuario tamén poderá facer calquera consulta medioambiental e, nun prazo máximo de 24 horas, terá unha resposta por parte dun equipo de expertos.

Ao servizo de Línea Verde tamén pode accederse a través do enderezo web www.lineaverdeoia.es . Ademais da canle de comunicación de incidencias e o servizo de consultas, esta web contén diversa información de tipo medioambiental: guías de boas prácticas, consellos, información propia sobre o municipio, etc.

Outra opción de contacto é o teléfono 902.193.768, en horario de 9.00 a 18.00 horas e cun custo da chamada de 0,07 euros por minuto.

Finalmente, a aplicación Línea Verde inclúe a posibilidade de difundir as comunicacións informativas que emita o propio Concello.