ACTIVIDADES DO CIM DA GUARDA PARA O MES DE MARZO 2015

O día 6 de marzo ás 20:30h no Centro Cultural da Guarda

Entrada de balde ata completar aforo.

Previa recollida de entradas no Centro Cultural ou no Centro de Información á Muller (ao lado do Xulgado de Paz)

Actividade subvencionada pola Secretaría Xeral da Igualdade e polo Fondo Social Europeo

Sinopse:
MARIÁN BAÑOBRE e ISABEL RISCO, artistas multidisciplinares, sempre na vangarda do deseño e das últimas tendencias, preséntannos a súa última creación: O furancho. Unha nova aposta empresarial que cheira a éxito a pesar do contexto hostil no que vivimos.
Un espazo cargado de "agroglamour" no que se fusionan as tendencias máis "trendies" con elementos propios da máis pura tradición, como os zocos e o pololo. Cada un dos detalles é parte dun todo harmónico configurado a partir de estilismos minimalistas e cálidos que sintetizan o pasado co presente, o rural co cosmopolita, o loureiro coas novas tecnoloxías.
Dúas mulleres fortes, con carácter e desbordante personalidade, que definen á perfección a esencia enerxética e desvergonzada das pallasas: dúas iconas femininas que foron, son e serán referentes de beleza universais e fonte de inspiración para todas esas loitadoras que son quen de poñer o mundo patas arriba para lograr que os seus soños se fagan realidade.
No noso furancho pódese consumir o excedente de viño, que é sinónimo de humor, e gozar dun espazo de comunión e complicidade no que o público acode a empaparse coa máis pura e sincera expresión da comedia hilarante.
E para quen non sexa de moito beber alcohol, no noso Furancho Spa resort vitinícola Rosalía de Castro ofrecemos tratamentos de beleza e saúde baseados na viñoterapia. O corpo humano é unha parra que se expande. Cada célula é unha uva que nos flúe por dentro. Nós cruzamos as sementes das cepas máis exquisitas para atopar a combinación perfecta que che aporte relax e benestar. Todo sen química, nin sulfitos. Ecolóxico 100%.

"Desconexión"

O Centro de Información á Muller (CIM) vai levar a cabo o programa "Desconexión" subvencionado pola Secretaría Xeral da Igualdade e o Fondo Social Europeo, no que se traballará o tema da igualdade, facendo especial fincapé na violencia de xénero.
O programa conta con dúas partes:
Na primeira delas, traballarase cos e coas menores aquelas áreas ocupacionais, como son as actividades da vida diaria, a educación, o xogo , o tempo libre e a participación social.
E a segunda parte será unha xornada lúdica e de convivencia enfocada a traballar coas mulleres e coas súas fillas e fillos, buscando proporcionar ferramentas de autoprotección e educación en igualdade, con puntos de encontro entre ambos que reforcen a través do xogo e da risa, así como de situacións cotiás, os vínculos socio-afectivos e materno-filiais.
Este programa levarase a cabo, previa derivación do CIM, os días 13 e 14 de marzo.