Ampliado o prazo de licitación do quiosco dos muíños do Folón e do Picón ata o 27 de setembro

O Concello do Rosal anuncia a ampliación do prazo de solicitude para a licitación da xestión do quiosco permanente dos muíños do Folón e do Picón. As persoas interesadas terán agora ata o 27 de setembro para presentar as súas propostas. Esta decisión foi tomada tras unha modificación das bases de licitación para aclarar un detalle relativo ao horario de apertura do quiosco. As solicitudes presentadas no prazo inicial non precisan ser modificadas.

A licitación inclúe a explotación e mantemento do quiosco, así como dos aseos e da pérgola da terraza, un espazo integrado na área de recepción dos visitantes, onde se destaca o valor patrimonial e natural da contorna. O proxecto busca ofrecer servizos tanto a turistas como á veciñanza, e combínase co obxectivo de fomentar o emprendemento local.

A concesión terá unha duración inicial de catro anos, con opción de prórroga por outros catro, e un canon anual de 1.038,39 euros, susceptible de mellora. Os interesados poden entregar as súas propostas de forma presencial no Rexistro do Concello ou envialas por correo certificado ata as 14.00 horas do 27 de setembro.

O Concello anima a todas as persoas e entidades interesadas a aproveitar esta oportunidade de negocio, que fusiona patrimonio, natureza e emprendemento.