ÁNGEL BAZ: EN NINGÚN MOMENTO EXISTIU UNHA PROPOSTA DE PACTO DE GOBERNO CO BNG POR PARTE DO PSOE DA GUARDA

Nas declaracións aparecidas nos medios de comunicación o PSOE fai referencia a unha "proposta detallada" que lle presentou ao grupo nacionalista sobre a que empezar a achegar posturas. No seu momento o BNG xa fixo pública a súa opinión sobre a diferencia insalvable de prioridades que se reflicte nesa lista, mais se agora o PSOE describe esa lista como "detallada" o BNG ten que manifestar a súa profunda preocupación sobre a visión que o PSOE ten das prioridades da Guarda.

Como é posible que alguén que aspira a gobernar o concello nestes tempos inclúa na súa "proposta detallada" as dedicacións exclusivas e parciais do seu equipo de goberno e esqueza a promoción de emprego, os servizos sociais ou calquera medida dirixida aos que máis están a sufrir os efectos da crise na que estamos inmersos? manifestou Ángel Baz.

Dende o BNG entenden que a proposta presentada estea aberta ás achegas que o BNG poida aportar, e dende logo porán todo o seu esforzo para que estas cuestións de caracter social pasen ao primeiro plano no Concello da Guarda. O que consideran lamentable é que teña que ser o BNG dende a oposición quen lle lembre ao Alcalde da Guarda que as necesidades básicas das veciñas e veciños que peor o están a pasar deben ter cabida na súa "lista de mínimos" por riba das adicacións exclusivas que van cobrar os membros do seu goberno.