Elefantes de papel doará 1? a Conrazones por cada exemplar vendido

A primeira opción que se nos pasou pola cabeza foi a de subilos a Amazon, pero a cousa foi a máis e decidimos facelo ben: correxilos, retocalos, levalos a imprenta, buscar alguén que nolos ilustrara...a cabeciña non para.

O libro componse de 52 relatos cortos en galego e castelán. A idea de facelo bilingüe débese ao feito de que Berto escribe habitualmente en castelán e eu en galego e pareceunos que o máis coherente era manter esa liña. En calquera caso a día de hoxe temos pensado que cada relato vaia nos dous idiomas, para que a xente decida como prefire lelo. A temática é moi variada e apta para o público xuvenil e adulto.

Somos conscientes tamén de que as ilustracións nun libro son moi importantes e por iso decidimos contar con Humberto Ademar Farias Iglesias, un rapaz moi novo pero todo un fenómeno por descubrir tanto pola boa man que ten para o debuxo como pola perspectiva dende a que ve o mundo. Falamos con el e aí o temos rompéndolle a cabeza cos debuxos.

Decidimos autopublicar sobre todo por unha razón: queriamos vivir o proceso dende o principio, traballalo pola nosa conta. Elefantes de papel non é un libro ao uso; todo ten as súas peculiaridades e os seus porqués... a idea, como che digo, non está formulada para sacarlle rendemento (que será benvido, se chega) con cubrir gastos estamos conformes e por iso podémonos permitir certas licencias que doutro xeito non serían viables. E o caso de doar un euro por exemplar vendido a Conrazones. Coñecemos de primeira man o traballo que levades a cabo e como cremos que non se debe vivir mirando para outro lado consideramos que a nosa obriga moral é colaborar dalgún xeito coa xente que se implica. Falamos con Piño que deseguida se puxo en contacto coa directiva e ás poucas horas xa tiñamos o visto bo. Do mesmo xeito, falamos coa ONCE para pasalo a Braille e de entrada pareceulles unha boa idea e andamos argallando outras sorpresas que sairán en breve.

Para promocionalo abrimos unha páxina en Facebook que leva ese mesmo nome ,Elefantes de papel, coa imaxe simbólica da cabeza dun elefante feito nunha técnica similar ao origami que para nós significa moito, e cada día publicamos un estado informando das novidades, deixando un anaquiño dalgún relato ou propoñendo ideas para que a xente participe e a verdade é que non nos podemos queixar porque leva menos dun mes aberta e xa pasa dos 200 seguidores. Consideramos que a promoción é esencial e por iso vos animamos a que sigades a páxina e a compartades ou se preferides vos poñades en contacto con nós a través da dirección de correo electrónico elefantesdepapel26@gmail.com

O feito de publicar implicou moito máis que poñerse a escribir ou recopilar textos. Berto e eu levamos escribindo dende cativos. O ano pasado fixemos algúns cursos coa escritora Clara do Roxo e alí entramos en contacto con este mundo. Participamos en certames, asistimos a presentacións, recitais, entrega de premios, etc.e cando o vimos claro dimos o paso. A verdade é que estamos moi ilusionado co proxecto e a xente que coñece a nosa escrita animounos a facelo. Agora é o público o que ten que falar. Gustaríanos telo nas librerías para o Nadal, pero non vai depender unicamente de nós. En calquera caso, como che digo imos colgando as novidades na páxina de Facebook.