Especial - A Guarda inaugurou a exposición -Proxecto táctil-

Na mañá do xoves día 19 de outubro inaugurábase no Centro Cultural da Guarda a exposición "Proxecto táctil", composta de obras contemporáneas realizadas por alumnos/as e ex alumnos/as da facultade de Belas Artes de Pontevedra (UVigo).

Na inauguración da exposición participaron o alcalde da localidade, Antonio Lomba, a concelleira de Cultura, Elena Baz, o director do Centro de Recursos da ONCE en Pontevedra, José Ángel Abraldes, a decana da Facultade de Belas Artes de Pontevedra, Silvia García, e o deputado de Cultura e Lingua, Xosé Leal.

Proxecto táctil
Unha decena de creadoras da Facultade de Belas Artes e da escola de moda ESDEMGA son as autoras de outras tantas obras que compoñen esta exposición, coa que se pretende explicar como ‘ver' coas mans e que durante este ano visitará cinco emprazamentos da provincia de Pontevedra cun duplo obxectivo: o de permitir que as persoas con discapacidade visual accedan á arte contemporánea de xeito normalizado e o de concienciar ao conxunto da poboación sobre as necesidades das persoas cegas. Para percorrer esta exposición convídase ás e aos participantes a facer uso de antefaces para percibir as obras doutro xeito. Ao ter que ‘ver' as obras sen facer uso do sentido da vista, pódese experimentar a forma en que as persoas cegas perciben os obxectos.

"Proxecto Táctil" está comisariada pola decana da Facultade de Belas Artes, Silvia García. Nesta ocasión, e a diferenza doutros proxectos cuxas pezas son creadas para ser tocadas, a comisaria elixiu obras que xa estaban realizadas pero que se adaptaban á idea de "ser táctiles" pola multiciplidade de texturas e materiais. Así, as teas, os metais, os vimbios, as escaiolas e as madeiras son os materiais que destacan na confección destas obras, cuxa autoría corresponde a Laura Álvarez, Andrea Domínguez Torres, Malú Feijoo, Alejandra Lago, Loaira Peres, Pilar Picas, Yolanda Ríos, Irene Romero, Anabel Santos Leites e Renata Sierra. A mostra foi presentada e exposta durante o mes de xuño na sede da Vicerreitoría da Universidade de Vigo en Pontevedra, a Casa das Campás, e no último trimestre do ano percorrerá os concellos de Caldas de Reis, A Guarda, O Porriño, e Lalín da man da Deputación de Pontevedra.