A afluencia de comensais e visitantes foi extraordinaria ao longo destas tres xornadas de festa, superándose todas as expectativas, público que visitou A Guarda dende todas partes de España e Portugal. A Concelleira de Turismo do Concello da Guarda, Montserrat Magallanes valorou esta XXVIII edición como a mellor das últimas 5 edicións, cunha extensa programación de actividades para todos os públicos que motivou unha masiva resposta por parte dos comensais. Os hostaleiros resaltaron que a venda de produtos foi un éxito, tendo que facer acopio de máis materia prima ante a gran "avalancha" de comensais, que dende o primeiro día desta festa, se desprazaron ata a carpa do porto para degustar e gozar da gastronomía galega e da cociña mariñeira.

Os comensais valoraron a ampla oferta gastronómica, cun total de 24 pratos da cociña mariñeira, viños da D.O. Rías Baixas e sobremesas onde non faltou a recoñecida Rosca de Xema Guardesa.

O actor, humorista e cantante galego Nancho Novo, foi o responsable de dar o pregón desta edición o pasado venres ante máis de 200 persoas que se congregaron na Praza do Reló da Guarda.

Neste acto, que estivo presentado pola comunicadora Beti Rey, interviron a Presidenta da Deputación de Pontevedra, Carmela Silva, o alcalde da Guarda, Antonio Lomba e o pregoeiro, Nancho Novo, que foi agasallado polo alcalde coa Langosta de Ouro da vila.

Tralo pregón realizouse a apertura da Carpa no Porto da Guarda onde veciños e visitantes degustaron os produtos do mar e da cociña mariñeira. Sobre as 22:30h Nancho Novo realizou o seu espectáculo "El Cavernícola".

A afluencia de público e comensais na xornada do venres foi moi importante, os restauradores participantes nesta edición afirmaron que "superáronse as expectativas para a primeira xornada con creces" "tivemos que facer acopio de produtos que tiñamos para a segunda xornada polo que o balance desta primeira xornada da festa é moi positivo".

Para finalizar este primeiro día da XXVIII Festa da Langosta e da Cociña Mariñeira realizouse un serán mariñeiro contando coas actuacións de grupos tradicionais y de pandeireta que amenizaron esta noite.

Xa na xornada do sábado 7 de xullo a Programación de actividades comezaba sobre as 11:00h co pasarrúas do Grupo A Boalleira da Gándara, dando lugar a apertura da Feira de Artesanía, que nesta edición contou cunha trintena de stands, localizados no Paseo do Porto.

Sobre as 12:00h do mediodía tiña lugar a XXIII Travesía a Nado do Porto da Guarda, un evento deportivo que congregou a máis de 50 deportistas que competiron en diferentes categorías nun percorrido de 1200m. Nesta XXIII edición resultaron gañadores absolutos Marcos Martínez Martínez e Antía Ortego Porta, entregándose ademais premios para o Nadador máis xove, Hugo Calvo Castro, o nadador máis veterano, Juan Enrique Salgado González, a nadadora máis xove, Laura Blanco Pérez para a nadadora máis veterana, Iria Álvarez Nion.

O Grupo Acevedos Delgados foi o encargado de amenizar musicalmente a hora do xantar, onde a afluencia de comensais voltou a ser moi significativa, ao igual que na xornada inaugural do venres, superando novamente as expectativas.

Pola tarde os máis cativos gozaron dos inchables acuáticos e co espectáculo de Maxia realizado por Valeria Varitas.

Ás 21:00h o cómico e monologuista Oswaldo Digon realizou unha actuación baseada nas experiencias do día a día, historias que ten escoitado e que a cotío suceden á maioría de nós, un momento que foi seguido pola gran afluencia de comensais que xa se preparaban para o xantar na carpa do Porto.

Un dos espectáculos máis agardados chegou nesta noite coa actuación do Grupo MITIC, onde a gaita foi a protagonista acompañada doutros instrumentos de vento, corda e percusión. Máis de 15 músicos ofreceron un concerto no exterior da carpa cunha proposta diferente onde reinventaron aos clásicos do rock e do pop con versións de AC/DC, Cómplices,... concerto que foi seguido de preto por centos de persoas.

Na derradeira xornada desta XXVIII edición A Boalleira voltou a facer un pasarrúas e o Grupo de pop-rock Acevendos Delgados fixo unha actuación musical para amenizar o inicio do xantar na carpa do porto, e tamén a esa mesma hora iniciose o obradoiro infantil de Mini-chef, onde os máis pequenos puideron participar na creacións e pratos e traballar na cociña.

O cómico Roi Borrallas ofreceu un espectáculo moi especial e animado para a mocidade e adultos, unha velada de maxia e diversión amenizando o xantar aos asistentes contando coa súa complicidade, seguido dunha segunda actuación de Acevedos Delgados.

Xa pola tarde entre as 17:00h e 20:00h os máis pequenos tiveron novamente a oportunidade de gozar coas instalacións de inchables acuáticos, unha nova proposta infantil incorporada nesta edición e que contou cunha boa aceptación e acollida.

Ás 19:00h Peter Punk e Brais das Hortas realizaron un concerto de Punkinfantil no exterior da carpa, contando con máis dun centenar de asistentes.

Como peche da festa, celebrouse a Noite de Fado, coa actuación estelar de Celina da Piedade, recoñecida artista portuguesa que ofreceu unha viaxe pola música tradicional portuguesa co seu acordeón, un concerto íntimo e directo que voltou a encher a carpa do porto, cun público moi entregado á música portuguesa, ao remate o Alcalde da Guarda entregoulle un agasallo conmemorativo a esta gran artista portuguesa.

Durante toda a fin de semana A Guarda ofreceu visitas guiadas á Rede de Museos, formada polo Museo do Mar, o Castelo de Santa Cruz e o Monte de Santa Trega, houbo unha gran feira de artesanía e tamén dispúxose dunha pantalla xigante para o seguimento dos partidos do Mundial de Fútbol.

Sen dúbida foi unha extraordinaria edición, superada polas expectativas iniciais e que unha vez máis puxo de manifesto o gran atractivo desta festa e da vila da Guarda para ofertar aos visitantes e locais produtos e servizos de primeira calidade. Entre os produtos máis vendidos a Langosta, con máis de 400kg vendidos, os percebes, con máis de 100kg vendidos, as zamburiñas, con máis de 70kg vendidos, os mexillóns, con máis de 130kg vendidos, e outros produtos como a Paella con máis de 370 racións ou a empanada, con máis de 900 racións.

GALERÍA DE FOTOS

Haz clic en la imagen de abajo para acceder a la Galería de fotografías