ESPECIAL - O BNG DE A GUARDA REALIZOU UNHA CAMPAÑA DE CONCIENCIACIÓN CONTRA A VIOLENCIA MACHISTA

Nos últimos tempos, o incremento do paro e o desmantelamento dos servizos públicos está empobrecendo de xeito especial ás mulleres e aumentando gravemente a nosa vulnerabilidade ante a violencia machista.

A dependencia económica é un obstáculo enorme para as vítimas de violencia de xénero que lles impide racharen coa situación que pon en perigo as súas vidas. Lamentablemente, coa desculpa da crise, as administracións públicas están a recortar programas e recursos imprescindíbeis para que as mulleres que sofren esta situación poidan saír adiante. O emprego, a independencia económica das mulleres é a principal ferramenta para a prevención da violencia de xénero. Os concellos deben contar cos recursos necesarios para desenvolver programas contra a violencia de xénero e os gobernos galego e español deben garantir que se apliquen con dilixencia as leis de prevención e protección contra a violencia de xénero. Todas as mulleres que sofren violencia machista deben ter a seguridade de contar con recursos económicos para a súa independencia, asistencia psicolóxica para superar as secuelas e asistencia letrada gratuíta. Non imos permitir recortes que xoguen coa vida e coa saúde de ningunha muller.

A falta de políticas comprometidas coa educación en igualdade está permitindo que se transmitan valores de submisión e sacrificio como carácteres positivos para as rapazas nas súas relacións afectivas. A idea da heroína romántica difúndese na literatura e no cine orientado á mocidade. Xa avanzado o século XXI, o número de vítimas do machismo é moi elevado entre as mozas máis novas e lonxe de erradicarse, vai en aumento. Esiximos programas de prevención e educación en igualdade para cortar a transmisión de ideas machistas que sustentan a violencia.

As administración deben tamén pór en marcha as medidas necesarias para erradicar comportamentos que sustentan a violencia machista na sociedade. A difusión de publicacións e opinións que atenten contra a dignidade das mulleres e promovan a desigualdade e a violencia machista deben ser sancionadas. Libros como Cásate y sé sumisa, páxinas de contactos nos xornais, certos comentarios de personaxes públicos, políticos e relixiosos non poden ser tolerados. O terrorismo machista está torturando e matando, está impedindo que as mulleres vivamos en paz e en igualdade. A tolerancia é complicidade.

A ameaza da volta atrás en logros conquistados despois de longos anos de loita feminista coma o dereito ao aborto tamén é violencia machista. O dereito a decidir sobre o noso corpo é innegociábel, non recoñecelo é un ataque directo á nosa dignidade. Non imos tolerar ningún paso atrás nos nosos dereitos!