ESPECIAL - PREGÓN DAS FESTAS DE SAN TELMO 2012 EN TUI

No acto, antes de dar paso ó pregón, coroouse ás raíñas das Festas 2012, que nesta ocasión declarouse a Blanca Alfaya Buján como raíña infantil, que estivo acompañada por María Rodríguez Oya e Beatriz Cerqueira de Dias e Fontes coma damas de honra. Como raíña xuvenil designouse a Blanca Leirós Jiménez, sendo as súas damas Nerea Míguez Viana e María González Sales. Elas serán as encargadas de representar á poboación tudense nos diversos actos durante as festas.

O acto contou tamén coa intervención do alcalde de Tui, Moisés Rodríguez, e dunha representante da Comisión de Festas, quenes fixeron fincapé na dificultade de organizar unhas festas desta magnitude en tan pouco tempo e desexaron ós veciños da vila tudense unha feliz celebración das mesmas.

De seguido comezou o pregón, nesta ocasión da man do padeeiro tudense, Manuel Garrido Barbosa, tres veces campión do mundo de maratón en c1 sub-23. Coñeceu a noticia para ser pregoeiro en Outubre do 2011 en boca do propio Alcalde de Tui, tras alzarse co seu terceiro campionato do mundo de dita modalidade. As suas verbas foron un alegato en defensa do deporte, das dificultades que moitas veces leva consigo ser un profesional, e que as medallas ademais de esforzo, constancia e amor polo que un fai, tamén ten que ter consigo unha axuda económica non só privada, senón tamén dende estamentos públicos que promocionen a sua actividade. Manuel Garrido fixo un guiño ó seu barrio, Riomuiños; barrio onde naceu e pasou a súa infancia e ó que lembra con agarimo, sobre todo ó recordar como os seus antigos veciños non dubidaron en facerlle unha benvida no propio aeroporto o ano pasado trálo mundial, e incluso adicarlle unha homenaxe.

O acto na Área Panorámica remataba co himno galego e trasladábanse os asistentes á inauguración de "Fitui 2012: exposición filatélica e de coleccionismo galaico-portugues". Nesta mostra conmemora o 50 aniversario da fundación e actividade do Grupo Filatélico e Numismático de Tui.

Xa ás 21:00h facíase o acendido das luces que iluminarán a cidade de Tui ata o día 16 de Abril, último día de celebración na honra do seu patrón San Telmo.

FOTOGRAFÍAS

VIDEOS