ESPECIAL - VISITA GUIADA POLA RUTA MÁXICA DE OIA

O pasado sábado día 16 de agosto tivo lugar unha visita guiada á Ruta Máxica de Oia organizada pola Asociación Cultural Amigos do Mosteiro de Oia (ACAMO) e a Asociación Naturalista do Baixo Miño (ANABAM) coa colaboración de a Asociación Forestal A Jalleira.

A visita, que tivo un percorrido aproximado de 20 km, partíu ás 09.30 h dende a estrada de subida á Valga que comunica Santa María de Oia coas parroquias de Burgueira e Loureza, a uns 1700 m da estrada Baiona-A Guarda). 

A visita estivo guiada por membros das dúas asociacións organizadoras (ACAMO e ANABAM), contando, ademais, coa colaboración da Asociación Forestal e de Educación Ambiental "A Jalleira" para a visita ás Sobreiras do Faro e do RAC máis Cool-Touring para a visita ao recinto de A Cabeciña.  

A Ruta Máxica de Oia ten en total uns 20 km de percorrido por 4 das parroquias do concello de Oia (Santa María de Oia, Pedornes, Viladesuso e Mougás), e conta con:

17 enclaves de especial interese, os cales inclúen 2 castros fortificados, 9 áreas con petróglifos, ata 10 puntos con fantásticas vistas panorámicas e 7 zonas de interese ambiental.

3 paneis-valla (inicio e final de ruta).

31 postes indicadores bidireccionais.

18 mesas informativas que ademais dos textos explicativos e os planos da ruta e das distancias entre os diferentes enclaves con indicación da súa localización, inclúen un total de 148 fotografías a color, 24 calcos de petróglifos e 6 mapas de localización dalgúns dos elementos que se ilustran.

As actuacións levadas a cabo nos últimos anos polas respectivas comunidades de montes, nas contornas dos petróglifos da Pedreira (Oia) e A Pousadela (Pedornes), nas Sobreiras do Faro (Viladesuso), así como no recinto fortificado e petróglifos adxacentes da Cabeciña (Mougás), todos eles elementos craves da Ruta Máxica de Oia, posibilitaron a realización da mesma.

Do total de 17 áreas de obrigada parada presentes no percorrido, en 10 delas pódese gozar de impresionantes vistas sobre a costa rochosa de marcado relevo e os núcleos de poboación das catro parroquias pola que discorre. Nove destas áreas inclúen grupos de petróglifos e en dúas delas tamén se poden observar os restos de dous recintos fortificados. Por outra banda, tamén se pode observar a característica orografía da ladeira occidental da serra da Groba coas súas pronunciadas pendentes sobre a rasa atlántica e os seus campos de cultivo. Outros accidentes xeográficos a destacar son o marcado canón do río Broi, os múltiples regatos que, sobre todo en épocas de choiva, tinguen de branco a súa canle ao estar cheos de fervenzas debido ás fortes pendentes, ou as numerosas pozas de baño que albergan, destacando as afamadas pozas de Mougás. En canto á flora cabe sinalar o sobreiral (Quercus suber) de Sobreiras do Faro, considerado o bosque mediterráneo máis occidental de Europa, ou os fentos xigantes (Dicksonia antarctica) presentes no río de Vilar. Dentro do reino animal, ademais da presenza de cabalos, vacas, ovellas e cabras, pódense observar outras especies de mamíferos tales como coellos ou xabarís, numerosas especies de aves, destacando a presenza de aves rapaces, así como case a totalidade de especies de réptiles e anfibios presentes na comarca do Baixo Miño, incluíndo a salamandriña galega ou rabilonga (Chioglossa lusitanica), un endemismo do noroeste peninsular. 

Fotos de Sara Carrera Coímbra