Este domingo chega a Oia o Rei Sol

A Asociación de Veciños de Viladesuso e a Comunidade de Montes de Viladesuso organizan o próximo 3 de setembro Rei Sol, un evento cultural e divulgativo centrado na promoción do patrimonio, a tradición e a etnografía da nosa contorna.

Trátase dun evento de carácter familiar pensado para o goce de pequenos e maiores, con actividades para todos os públicos e centrado en dúas localizacións diferentes: o Refuxio da Fonte do Toxo e o Castro do Cano dos Mouros.

O domingo 3 pola mañá as actividades realizaranse no Refuxio da Fonte do Toxo, desde onde sairá unha andaina sobre os valores paisaxísticos, patrimoniais e a toponimia da contorna. Posteriormente celebrarase un concerto do grupo Algarabía e un xantar popular con churrasco a prezos populares. Paralelamente a esta programación a cativada poderá desfrutar de actividades infantís dirixidas, a través das que coñecerá o Garrano da Groba e unha gran variedade de xogos na natureza.

As actividades da tarde desenvolveranse no Cano dos Mouros. A programación comezará cunha visita teatralizada ao castro a cargo do campamento de voluntariado arqueolóxico e a continuación desenvolverase o espectáculo infantil “Xan das Ondas”. Como en anteriores edicións deste evento, o acto central da xornada será a representación preparada especificamente para a ocasión polo grupo local “O Mellor de Cada Casa”. A obra de teatro rematará xa á tardiña para deixar paso á actuación do grupo Tra-lo Mosteiro, que porá o broche final coa súa música á posta do sol.

Programación O Rei Sol | Domingo 3 de setembro de 2023 MAÑÁ: Refuxio Fonte do Toxo (localización)
? 10:00 Roteiro da toponimia (aprox. 3h).
? 10:00 Actividades infantís, ata ás 16:00h.
? O Garrano da Groba
? Xogos na natureza
? 12:30 Concerto de Algarabía
? 13:30 Xantar popular (churrascada)

TARDE: Castro Cano dos Mouros (localización)
? 17:00 Visita teatralizada
? 18:00 Xan das Ondas (espectáculo familiar)
? 19:00 Representación teatral (grupo: O mellor de cada casa)
? 20:00 Actuación musical de Tra-lo Mosteiro ao solpor