Helen & Shanna e Arancha Brandón seleccionados na Sección Oficial de Videoclips do Festival de Cans

“Carmo 22” é un dos singles que recentemente estreou a banda de entre A Guarda e O Rosal, Helen & Shanna, o seu videoclip gravado pola directora e fotógrafa da Guarda, Arancha Brandón foi seleccionado na Sección Oficial de Videoclips do Festival de Cans que esta semana celebra o seu XX aniversario.

O clip foi rodado nos arredores da Casa do Río no concello do Rosal, un lugar fermoso cheo de natureza e recordos da infancia para toda a banda e equido de rodaxe. A través dunha letra poética e unha música atmosférica, Carmo 22 fala sobre unha viaxe reveladora, a amizade e o amor. Unha procura contínua cargada de matices musicais e líricos. O vídeo é, en palabras da directora, “unha homenaxe ás historias de aventuras. Viaxamos entre o pasado e presente a través da utilización de símbolos místicos”. Para iso serviuse dunhas localizacións bucólicas e un estilo contemplativo idóneo para redondear este concepto. O río, elemento protagonista da peza, ten un gran significado tanto para a realizadora como para a banda, pois ambos naceron á beira do Miño, xunto á fronteira portuguesa. A proposta sonora é moderna e clásica á vez, igual que o vídeo, gravado tanto en dixital como en analóxico.

A presentación dos videoclips será este martes 16 de maio no Centro Municipal do Porriño, comezará ás 19:00 h. co Encontro Dalle Caña de creadores de clips onde falarán dos seus traballos. Ás 20:30 h. está previsto o coloquio con proxeccións sobre a Evolución dos Documentais da Historia do Rock, con fragmentos de imaxes dos mesmos, que dará o xornalista musical Xavier Valiño, tamén membro do xurado de videoclips.

A proxección dos 18 videoclips a concurso, “Noite Lasal Cociñas de Clips” comezará ás 22:00 h. na Praza do Concello de Porriño, e alí poderanse ver traballos de Fillas de Casandra, Ruxe Ruxe, Boyanka Kostova, Grande Amore, O Rabelo, Laura Lamonyagne e Pico Amperio, Carolina Rubirosa, Guadi Galego e Nabú, entre outros. O peche será coa actuación de Zeltia Irevire.

O videoclip gañador será elixido o vindeiro sábado 20 en Cans.