O alcalde da Guarda traslada a Cores Tourís as demandas do concello á Xunta de Galicia

Durante a reunión analizaron unhas demandas que para o alcalde son obras e infraestruturas prioritarias para o desenvolvemento socioeconómico da vila no presente e no futuro e que cómpre que a administración autonómica, e nalgúns casos tamén a provincial, tomen conciencia destas necesidades.

Un dos principais puntos tratados foi a petición dun plan de investimentos con prazos concretos para o rematar a Vía de altas Prestacións Tui-A Guarda, unha obra que leva pendente dende o ano 2004 e que é prioritaria non só para A Guarda, senón para toda a comarca do Baixo Miño. Así mesmo, analizouse a necesidade dunha saída sur, planeada no PXOM dende o ano 1993 e unha obra fundamental para regular a mobilidade no casco urbano da Guarda.

Tamén se analizaron propostas relativas ao monte Santa Trega como a execución do proxecto dunha senda de circunvalación ao monte; unha demanda presentada en varias ocasións que serviría para mellorar a Seguridade Vial nesta estrada. En relación ao Trega, tamén se tratou a subida dos diferentes servizos ao monte, un proxecto que xa foi presentado ante a Dirección Xeral de Patrimonio. Ademais, o alcalde quixo destacar que dende que se executou o tramo III da VAP Tui - A Guarda non existe un paso para peóns na rotonda de San Roque. É unha cuestión de Seguridade Vial que Carreteras habilite este paso.

Entre as demandas estudadas se incluíu a realización dun Auditorio Municipal, unha obra para a cal a Xunta de Galicia xa tivo no pasado partida orzamentaria coa intención de redactar o proxecto. Tamén se solicitou colaboración na reforma do Pavillón Municipal, un espazo que é utilizado polos colexios e clubes deportivos da vila e no que xoga o club de balonmán feminino Atlético Guardés, que dende fai anos milita na máxima categoría do balonmán nacional.

Para rematar, o alcalde transmitiu a demanda da humanización e ordenación do tráfico na praia do Muíño, para o cal o concello xa redactou un anteproxecto e ten valorada a execución dunha obra que xa foi presentada en anteriores ocasión ante o delegado territorial.