O BNG da Guarda chama a mobilizarse contra a suba dos prezos

O pleno do Concello da Guarda ven de aprobar a  proposta do BNG, coa abstención do grupo de goberno do PSOE,  unha serie de medidas que deben impulsar os gobernos galego e central para mitigar o impacto do medre disparado da inflación na sociedade e economía galegas.

As persoas que cobran o mesmo salario que hai un ano, pagan moito máis cara a electricidade, os carburantes,a bombona do butano, a cesta da compra e o aluguer.

O prezo da electricidade, dende  decembro de 2020 multiplicouse por dez.

Mentres moitas familias non poden pagar a luz ou a calefacción, as tres grandes eléctricas superaron  no 2021 os  6500 millóns de euros de beneficios. Non pode ser que os intereses das eléctricas pesen máis que as necesidades das familias e das clases traballadoras.” salientou Anxo Baz.

Aumentaron moito tamén os prezos dos combustíbeis, supoñendo un grave problema para as persoas que non poden desprazarse en transporte público (moi deficitario no noso país) e para os sectores profesionais que o precisan. Subiu tamén o prezo dos produtos básicos de alimentación (aceite, carne, peixe, froita, pan, ovos) da bombona, do gas, dos alugueiros...

Por estes motivos, o BNG da Guarda anima a cidadanía a participar na manifestación do vindeiro día 3 en Santiago de Compostela en contra da suba xeneralizada dos prezos. Dende A Guarda, sairán autobuses para desprazarse a esta mobilización. Reserva de prazas  no teléfono 618233826.