O CASTRO DA CABECIÑA XA TEN A SÚA CERVEXA

A cervexa Cabeciña é froito da colaboración entre os cervexeiros de Trisk-Ale, de Nigrán, e o Proxecto Mougás, que busca dinamizar esta parroquia do sur de Galicia. "Estamos moi satisfeitos co resultado da festa; probamos unhas cervexas exquisitas e ademais demostramos que o Castro da Cabeciña pode ser un espazo de lecer no século XXI e mesmo unha marca baixo a que distribuír produtos da zona" declarou Xosé Gago, coordinador de Proxecto Mougás.

Durante a xornada do sábado 6 tiráronse 960 cañas, á venda por tan só 50 céntimos cada unha; un prezo moi popular para que os máis de 500 asistentes -segundo estimacións da organización- puidesen probar os catro estilos de cervexa artesá antes de votar polo seu favorito.

As catro receitas foron elaboradas especificamente para a ocasión polos irmáns Roberto e Andrés Toledano de Trisk-Ale. A idea inicial era elaborar cinco estilos pero un deles contaminouse durante a fase de maduración; algo que pode suceder na elaboración de cervexa artesá pola total ausencia de químicos nos seus ingredientes e os estritos controis de calidade.

A pesar deste pequeno inconveniente, os cervexeiros están moi contentos co resultado da festa: "Malia tratarse da primeira edición, acertamos nas expectativas de venda e seguramente achegamos a cervexa artesá a persoas que antes non a probaran. Ademais do bo rato que pasamos nun entorno privilexiado!" comenta Roberto.

Os catro estilos repartidos en oito barrís servíronse ao longo da toda a festa, dende o seu inicio ao mediodía ata as 7 da tarde cando estaba programado o peche de billas. Os asistentes ían votando nunha furna a súa favorita. Tras o reconto a organización revelou hoxe a cervexa gañadora: o carácter aromático e refrescante da American Amber Ale, numerada co tres durante a cata, rebautizada agora como cervexa A Cabeciña.

Os irmáns cervexeiros calculan que entre dúas e tres semanas a cervexa estará á venda en bares da contorna de Oia e arredores e nos circuítos habituais de Trisk-Ale. "Actualmente está na fase de segunda fermentación en botella" comentan.

O estilo American Amber Ale

Trátase dun estilo nacido na Costa Oeste dos Estados Unidos e relativamente recente. É un estilo popular en América que gusta tanto ao público cervexeiro como aos menos iniciados polo seu carácter refrescante e aromático.

En xeral, é un estilo equilibrado no que o amargor do lúpulo e a dozura das maltes adoitan estar compensados. Do mesmo xeito, a porcentaxe de alcohol non adoita ser alta, no caso da cervexa Cabeciña, 4´5º.

En suma, trátase dunha cervexa compensada, de trago doado, e que gustará a todos os públicos. Unha cervexa popular que viaxa dende a Costa Oeste Americana ata nosa Costa Oeste para converterse na cervexa "A Cabeciña".