O Cineclub Poleiro proxecta este xoves o documental -fráxil equilibrio- narrado por José Mujica

Un documental potente, narrado polo ex-presidente uruguaio José Mujica que da pé á reflexión sobre o noso compromiso cos dereitos humanos e as inxustizas sociais.

É unha película universal que a través de tres historias en tres continentes mostra que as clases sociais dividen pero a humanidade nos une.
FRÁXIL EQUILIBRIO, dirixido polo galego Guillermo García López, levou o Premio Goya ao mellor documental en 2017.
O pase será no Auditorio de Goián o xoves, 13 de xuño, ás 21:30 h con entrada de balde.
Unha película potente que fala de que é vivir, que significa traballar, de implicarse en descubrir que son os dereitos humanos, que hai máis alá das fronteiras dos países desenvolvidos, da existencia da pobreza extrema....
A proxección é unha colaboración do cineclub Poleiro coa Comunidade de Montes de Goián, dous días antes da celebración da Festa das Trincadeiras. Con ela queremos destacar a unidade dos veciños de Goián, que hai 29 anos conseguiron preservar un monte comunal de gran valor ecolóxico, expropiado polo MOPU para extraer áridos para a autovía Vigo-O Porriño. Un xesto que demostrou como unha Comunidade de Montes pode ser garante , no seu territorio, da defensa dese "fráxil equilibrio".
Sinopse da película: A través de tres historias e as palabras tecidas polo ex-presidente uruguaio, José Mujica, vémonos reflectidos nos migrantes africanos, traballadores españoles, empregados xaponeses ...e ao final dámonos de conta de que as clases sociais dividen pero a humanidade nos une. O que nos fai diferentes non é tanto como o que nos fai iguais. Calquera que sexa a clase ou a cor, esforzámonos polas mesmas cousas.