O Club de Xubilados da Guarda pide axuda ao concello

Os problemas comezaron cando o anterior presidente se viu obrigado a deixar o cargo por problemas de saúde. Dende ese momento, fixéronse responsables de forma eventual membros da súa directiva co compromiso de convocar un pleno no que debían presentarse novos candidatos para levar o club, e así o fixeron pero non se presentou ninguén

A xestora provisional está facendo esforzos para contactar con socios que queiran botar unha man para evitar o peche do club, cousa que sucederá se non aparece unha nova directiva antes de fin de ano, data na que remata o seu compromiso.

Nesta reunión trasladaron a súa preocupación aos responsables municipais, nela falaron das consecuencias que a desaparición do club podería ter. Unha das primeiras sería a perda do local no que teñen a súa sede, que é propiedade do ISM. Corren perigo tamén de desaparecer as numerosas actividades que dende fai moitos anos vén realizando o club: Coral, grupo de gaitas, bordado, Tai Chi, bolillos, etc.

O alcalde comentou a importancia social que o club ten para A Guarda e a enorme perda que implicaría o seu peche, así como o prexuízo que xeraría a moitos dos seus socios por ser un elemento fundamental do dinamismo social, cultural e da actividade física para os seus numerosos compoñentes que nestes momentos roldan os 500.

Todos os presentes na reunión adquiriron o compromiso de continuar mantendo contactos persoais con xente da vila que estea disposta a comprometerse para seguir mantendo vivo o club. É necesaria a implicación da cidadanía para manter vivo aquelo que realmente importa. Neste caso o Club debe importarnos moito a todos os guardeses, poderíamos dicir aquelo de que o Club da 3ª idade é cousa de todos.