O Concello da Guarda asina coa deputación o convenio para a execución do proxecto Deporemse

O proxecto que se vai financiar na Guarda, a través do Plan DepoRemse, consiste na mellora da mobilidade e seguridade no entorno da Rúa Vigo e Celta. Ten un custo total de 588.235,29 euros, dos que a Deputación achega 500.000 euros.

En total, o Plan de Remodelación e Mellora da Seguridade dos Viarios Municipais (DepoRemse) beneficia a 31 concellos da provincia de menos de 50.000 habitantes, cun investimento de 11 millóns de euros. A través de DepoRemse, a Deputación impulsa proxectos que van permitir aos concellos remodelar rúas e viarios a fin de facilitar a comunicación entre espazos de emprego e de uso social, sanitario ou educativo, así como mellorar aqueles trazados que soportan unha alta densidade de tráfico tanto peonil como rodado. Trátase dun novo instrumento de cooperación entre a institución provincial e os concellos que busca unha mobilidade sostible que dea prioridade á seguranza e á mobilidade peonil nas infraestruturas viarias.

Na sinatura dos convenios de colaboración, a presidenta recoñeceu o esforzo dos concellos da provincia por recuperar os espazos públicos para as persoas e de aí que o Plan DepoRemse vaia contribuír a este obxectivo, "logrando que os vehículos non ocupen o primeiro lugar nos nosos pobos e vilas e as persoas pasen a ser a prioridade". Carmela Silva aproveitou ademais o acto de hoxe para demandar que os procedementos administrativos para poder levar adiante os proxectos "sexan cada vez máis áxiles, menos gravosos e menos complicados, xa que non só é algo que afecta ao desenvolvemento dos proxectos, senón tamén á súa execución".