O pasado sábado a comunidade de montes de Viladesuso viu de celebrar o seu 40 aniversario

O 28 de xaneiro de 1983, e tras varios anos de loita e reclamacións, o Xurado Provincial de Montes Veciñais de Pontevedra dita resolución a favor da veciñanza de Viladesuso, rematando así, o proceso de clasificación do monte veciñal de Viladesuso, devolvendo definitivamente o monte os seus lexítimos propietarios.

Previamente aos actos de conmemoración, o pasado xoves 26 na igrexa de Viladesuso, celebrouse unha misa en memoria daqueles comuneiros defuntos que participaron activamente na xestión e coidado do monte veciñal.

No acto do pasado sábado 28, a comunidade de montes de Viladesuso agradeceu cun sentido homenaxe a aqueles comuneiros responsables da xunta xestora e da primeira xunta directiva, que grazas ao seu esforzo recuperaron e coidaron o noso monte veciñal.

O acto conmemorativo iniciouse cunha charla a cargo de Lara Barros Alfaro historiadora e investigadora sobre montes veciñais, centrouse no ámbito da Serra da Groba, contextualizou e fixo unha aproximación aos diferentes conflitos e amezas que recibiron as comunidade rurais e os montes veciñais ao longo do tempo. De seguido proxectouse o documental “O monte é noso” do director recentemente falecido Llorenç Soler, filmado no ano 1978 durante as mobilizacións para a recuperación de diferentes montes veciñais ó longo do pais.

Unha vez rematado, realizouse un acto de homenaxe coa entrega dunhas escultura exclusivas a aqueles comuneiros fundadores como agradecemento pola súa implicación.

Posteriormente rematouse o acto cuns petiscos para todos os asistentes.