O PP Provincial celebra unha reunión de traballo nas Neves coa candidatura das eleccións autonómicas 2024 con motivo do 1º aniversario da vitoria de Alfonso Rueda

O PP Provincial, co seu presidente Luis López á cabeza, vén de celebrar unha reunión de traballo no municipio das Neves con todos os integrantes da candidatura pola circunscrición de Pontevedra nas pasadas eleccións autonómicas 2024 con motivo do 1º aniversario da vitoria, con rotunda maioría absoluta, de Alfonso Rueda.

Os populares foron recibidos na vila, antes do seu encontro, polo alcalde das Neves, José Manuel Alfonso, con quen departiron sobre os proxectos e a reactivada xestión municipal despois de que o PP recuperase o goberno local deste municipio do Condado hai preto de dous anos.

Posteriormente, Luis López, que estivo acompañado pola secretaria xeral provincial, Luisa Piñeiro, e polos conselleiros Román Rodríguez e José López, entre outros cargos, analizou os retos e os proxectos de futuro para a provincia, facendo especial fincapé no maltrato que o PSOE, a través do Goberno de España, está inflinxindo a todo o territorio de Pontevedra.

Así mesmo, a xuntanza tamén tivo unha parte de celebración por mor deste primeiro aniversario, no que se destacou o gran traballo de toda a candidatura, as 61 agrupacións locais, os alcaldes, voceiros, concelleiros e militantes para colleitar un “magnífico resultado” de 11 deputados nas pasadas eleccións autonómicas e no que se brindou pola maioría absoluta sen paliativos obtida por Alfonso Rueda en toda Galicia.

Finalmente, o presidente provincial e os integrantes da candidatura pontevedresa tamén destacaron a “implicación, sensibilidade e compromiso” do presidente e de todo o Goberno galego coa provincia e comezaron a deseñar as estratexias de traballo para repetir ou mellorar este maioritario apoio electoral nas eleccións municipais de 2027.