O XULGADO DE PRIMEIRA INSTANCIA E INSTRUCIÓN NÚM. 1 DE TUI DECLARA NULA A ASEMBLEA DE SOCIOS E SOCIAS CELEBRADA HAI UN ANO NO CENTRO SAN XEROME

O Xulgado de Primeira Instancia e Instrución núm. 1 de Tui declara nula a asemblea de socios e socias celebrada hai o 31 de maio de 2014 no Centro San Xerome e declara o dereito das socias e socios demandantes a ter acceso ao censo de socios aos efectos de poder convocar unha asemblea xeral extraordinaria que viña sendo solicitada desde 2013 e que nunca se puido efectivizar por negarse a Dirección do centro a facilitar os datos necesarios para poder exercer o dereito recollido na lexislación vixente aos socios e socias para poder convocar unha asemblea. O Xulgado impón as costas ao Centro San Xerome.
Os motivos que levaron a un grupo de socios e socias a impugnar a asemblea de 2014 foron por un lado os impedimentos para poder facer efectiva a solicitude de convocatoria dunha asemblea extraordinaria e tamén que, por primeira vez, se lles negou o dereito ao voto argumentando diferenzas de tipo de socio/a.
O Xulgado considerou que quedou probado que todos os socios tiñas as mesmas obrigas e pagaban as mesmas cotas polo que "ao esixírselles aos actores, na súa condición de socios, as mesmas obrigas que a aqueles outros cuxo dereito a voto resulta contrastado, han de outorgárselles necesariamente idénticos dereitos, con independencia de calquera posible categorización." Na vista quedou probado que até a data todo o mundo exercera os mesmos dereitos, mesmo a través da declaración da Dirección do Centro que en 2014 negou este dereito aos demandantes. A sentenza recolle tamén que en actas anteriores non se recollen aspectos básicos na vida de calquera asociación "A documentación achegada... resulta coherente... en canto á informalidade das mesmas en canto ao control de asistencia, participación e voto. Na maior parte... non se indica sequera de forma expresa se se vota para aprobar as contas, os cambios nos membros das xuntas directivas" etc.
O Xuíz determina que, aínda sendo suficiente para declarar a nulidade da asemblea o feito de negar nesta ocasión o voto a quen se lle permitiu telo anteriormente, é tamén motivo de nulidade a negación do voto por constituír un incumprimento da Lei 1/2002 que regula o Dereito de Asociacións, pois unha vez probado que todos os socios teñen as mesmas obrigas hai que considerar ademais que a Lei establece que poden "existir nas asociacións diferentes tipos de socios, mais de ningunha maneira sinala que estas clases diferentes poidan ter diferentes dereitos." Polo que conclúe que as e os demandantes foron privados dun dereito fundamental das persoas asociadas.
Finalmente o Xulgado tamén considera que as e os asociados demandantes teñen dereito a consultar o censo de asociados coa finalidade de poder exercer o seu dereito para solicitar a convocatoria a unha asemblea extraordinaria e que os datos postos a súa disposición polo centro non eran suficientes para posibilitar ese dereito.
Por todo isto declara nula a asemblea e condena á Asociación San Xerome a entregar o censo aos asociados que o demandan para poder convocar unha asemblea extraordinaria e condena tamén ao San Xerome a aboar as costas do xuízo.
As e os demandantes reclamarán a entrega do censo para poder realizar o trámite preceptivo de esixir a convocatoria dunha asemblea extraordinaria en que se debe falar da situación do Centro e da xestión realizada nestes dous anos. Agardan que a Dirección do Centro deixe de obstaculizar o exercicio do dereito das socias e socios e dea contas da situación creada e asuma inmediatamente as súas responsabilidades e responda por elas.