Oia acolle este luns un curso formativo sobre ximnasia de mantemento dentro do Plan Conectadas 2018 da Deputación de Pontevedra

Máis polo miúdo, a actividade de Oia está organizada pola Asociación de Mulleres Rurais e desenvolverase os luns na Casa do Pobo e os mércores nas Escolas de Lourezá, en horario de 21:00 a 22:00 h. A acción formativa da Estrada corre a cargo da Asociación de Mulleres Rurais de Tabeirós e impartirase no lugar da Consolación a partir do próximo sábado, en horario de 16:00 a 19:00 h. Para Oia hai anotadas un total de 35 persoas e para A Estrada un total de 15 persoas. A estas accións formativas poden sumarse tanto homes coma mulleres e o obxectivo é promover e traballar na igualdade entre homes e mulleres.

"Conectadas 2018" é un programa da Deputación de Pontevedra destinado a asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, o seu desenvolvemento e empoderamento, así como a paulatina consecución do obxectivo da igualdade de mulleres e homes.

Neste ano, Conectadas conta cun orzamento de 324.000 euros e desenvólvese a través de 46 accións formativas distribuídas en 8 bloques temáticos: "Muller emprende: iniciativas sostibles para o emprego", "Muller e cultura: Artes Visuais", "Actualízate", "Coas túas mans", "Porque ti o fas", "Súmate ao cambio", "Ponte en forma" e "Coidados persoais". En 2017 beneficiáronse desta iniciativa un total de 343 entidades pertencentes a 60 concellos da provincia, o que supuxo que preto de 5.500 persoas participaran nas distintas actividades programadas.