OS ALUMNOS E ALUMNAS DE EDUCACIÓN INFANTIL DO COLEXIO -A SANGRIÑA- VISITAN O CONCELLO E A POLICÍA LOCAL

A visita comezou na sala de plenos onde o alcalde da localidade, José Manuel Domínguez Freitas, deulles a benvida ós pequenos. Alí, os nenos e nenas puideron sentarse nas cadeiras dos concelleiros e probar os micrófonos da sala. Dende aquí, acompañados polo alcalde e os profesores, os cativos recorreron os diferentes departamentos da casa consistorial.

Entre outros lugares, os rapaces estiveron no despacho do alcalde e tamén no de Antonio Hernández, arquitecto do concello. Os nenos e nenas preguntaron, por exemplo, cales eran as funcións do alcalde ou quen decidía onde se fabricaban as vivendas. Hernández mostroulles diferentes planos para que se fixeran unha idea de cal era realmente a súa tarefa.

Tras inspeccionar cada uno dos espazos do concello, os nenos e nenas dirixíronse as dependencias da Policía Local. Alí, por quendas, foron coñecendo o cabo primeiro, José Antonio Taboada, quen lle mostrou as dependencias e tamén lles deu varias recomendacións. Taboada recordoulles que sempre teñen que cruzar as estradas polo paso de peóns e usar as cadeiras correspondentes e o cinto de seguridade cando vaian en coche. Os alumnos de tres anos entregáronlle o corpo de policía un mural no que lles daban as grazas por axudarlles na súa actividade de educación vial que fixeran no centro.

Os nenos, tras a visita, afirmaron que o que máis lles gustara fora, entre outras cousas, poder coñecer ó alcalde e o cabo primeiro da Policía, ademais de escoitar a sirena do coche policial e sentarse na cadeira do rexedor. Pola súa banda, o alcalde, afirmou que pola súa profesión -é mestre- sempre é "moi agradable" recibir a nenos no Concello. "Son moi gratificantes as visitas dos máis pequenos porque estes son o futuro da nosa localidade", manifestou.