Primeira actuación en 20 anos na antiga Casa Forestal do Monte Sta. Trega

A antiga Casa Forestal do Monte Sta. Trega de A Guarda, enmarcada nun lugar paisaxístico incomparable, ao carón do Poboado Galaico-Romano e con vistas sobre o Atlántico e o Río Miño, vai recibir a súa primeira actuación despois de case 20 anos de abandono.

A principios da década dos anos 90´s a antiga Casa Forestal foi cedida a Patrimonio da Xunta de Galicia para a realización dun Museo ou Centro de Interpretación que nunca víu a luz, quedando dende aquela a merced das inclemencias do tempo, o paso dos anos e os actos vandálicos que deterioraron aínda máis a súa infraestructura.

A Comunidade de Montes de Camposancos ven de anunciar que Patrimonio resolveu finalizar a cesión, polo cal esta edificación volve a estar en mans desta Comunidade, que ten xa un principio de acordo co Concello de A Guarda para invertir neste espazo algo máis de 15.000€ para a rehabilitación do tellado e fiestras da edificación, para evitar deste xeito, que este espazo se deteriore máis e poder darlle algunha utilidade. A inversión é froito do diñeiro que quedou sen transferir e que agora se empregará para arranxar o tellado.

A Comunidade de Montes de Camposancos é consciente de que con este diñeiro non se rehabilitará por completo a infraestructura, pero si servirá para iniciar unha rehabilitación que permita darlle un uso a este espazo despois de tantos anos de abandono.

O Monte de Sta. Trega ven de sufrir unha transformación por parte das Comunidades de Montes que permitíu que se recuperaran antigos camiños e sendeiros, que permiten un maior disfrute deste espazo, proba delo foi a recente edición do Trail do Monte Sta. Trega, que percorreu uns 18 km de sendeiros e camiños, cun grao de satisfacción moi alto por parte dos participantes.