San Xerome cumple coas súas persoas. Óscar e sandra de novo no centro.

Despois de reivindicar e negociar coa Xunta de Galicia o financiamento das dúas prazas que precisan, e sen obter ate o momento ningunha resposta satisfactoria pola súa parte, a Xunta Directiva do San Xerome considerou que esta situación é intolerable, porque estamos falando da vidas, de vidas de persoas, coas que os tempos das Administracións non son compatibles, tempos polos cales Óscar e Sandra non poden esperar.

Así, a Xunta Directiva do San Xerome decidiu asumir por conta da Asociación que Óscar e Sandra volvan a estar entre nós, disfrutando de novo da súa vida, a vida que tanto lles gusta e tan ben lles fai, e dos apoios profesionais que lles ofrece o noso Centro, tanto a eles como ás súas familias, incluso a risco de poñer en perigo o resto dos Servizos que prestamos ás mais de 100 persoas usuarias e familias.

Dito e feito, Óscar e Sandra dende hoxe volven a estar en San Xerome, xa se atopan novamente entre os seus compañeiros e compañeiras, grazas ao apoio incondicional e solidario da nosa Xunta Directiva.

Seguimos á espera da resposta positiva que a Xunta de Galicia se comprometeu a darnos, para asumir o financiamento destas dúas prazas.

San Xerome cumpre a súa palabra e o seu compromiso. A Xunta de Galicia non pode ser menos.

No caso de que a Xunta de Galicia non responda segundo o apalabrado, a Asociación prevé realizar mobilizacións reivindicativas, a partires do vindeiro martes 28 de xaneiro, que dean a coñecer a situación mais aló da nosa contorna; así como poñer en marcha unha campaña de captación de fondos que permita asumir os elevados custos desta arriscada, pero imprescindible decisión de Acción Social.