Sanitarios da Guarda esixen a cobertura de dúas prazas ante a sobrecarga de traballo no Centro de Saúde da Guarda

As médicas de familia do SAP da Guarda queremos denunciar publicamente a situación actual do centro, que leva desde inicios de ano con dúas prazas sen cubrir. Esta situación leva a un aumento na sobrecarga de traballo que nos vindeiros meses pode empeorar.

Malia que este ano todo o persoal do SERGAS ve diminuida a súa xornada laboral, no noso caso vaise ver aumentada de forma encuberta ao obrigárennos a cubrir en quendas de sábado as vacantes, mediante un sistema obsoleto de reserva que no pasado servía para facer fronte a imprevistos.

Esta medida, que nos calendarios a inicio de ano non existían, supón un agravio sobre todo nos centros de saúde máis periféricos e nos que existen vacantes sen cubrir. O que supón unha sobrecarga adicional da carga de traballo, a limitación de dereitos laborais, e o que e aínda peor, que centros como os da Guarda, o do Rosal e Oia, considerados de difícil cobertura, terán maior complicación na cobertura das súas vacantes, producindo un prexuízo na poboación.

Sorprende porque a inicios de semana Conselleiro e Xerente desta área viñeron ao centro a anunciar grandes promesas, cando medidas fundamentais, como a de tomar medidas para a cobertura de persoal no centro ou facer realidade o segundo equipo no PAC seguen a ser as grandes promesas incumpridas, sendo medidas que mellorarían a calidade asistencial da poboacion Baixo Miño.

Desde o noso colectivo queremos lembrar que sen persoal non hai sanidade.