Tui acolle este venres a Proxección -Camilo: o último guerrilleiro de Galicia-

O Movemento Social organizado en sociedades e sindicatos agrarios desenvolveu, na tres primeiras décadas do pasado século XX, esforzos inxentes na procura de melloras e transformación dunha realidade social, inxusta e excluínte. Sociedade na que a maioría da poboación galega vivía nun medio rural sometido a cargas impositivas, como os foros e outras rendas feudais, aínda existentes nesa altura; unhas cargas que, residuos dun mundo señorial, aínda tiñan que soportar mulleres e homes empobrecidos que se vían abocados á emigración cara América.

En Sobredo, en 1922, prodúcese unha tráxica manifestación da represión por parte dos que, amparados nunha xustiza e forzas da orde au seu dispor, aínda pretenderon manter unha orde social señorial, anacrónica e xa desfasada.

Fronte a ese pasado agromou unha nova realidade que loita pola eliminación de foros e procura mellores condicións de vida; contando para iso cos escasos recursos que aporta a terra e coas remesas que chegan dos emigrados; organizándose en entidades asociativas coas que:
promover construción de escolas; adquirir sementes e maquinaria agrícola; demandar construción e melloras de camiños, vías de comunicación imprescindibles para por nos mercados os produtos; etc.

Todo isto foi derrubado co golpe de estado do ano 1936; a guerra e dura represión que seguiu ao golpe militar esfarelou todo esforzo de transformación social; e, cunha sentenza de damnatio memoriae, foi quen de eliminar todo canto lembrase ese esforzo, fosen persoas, monumentos, institucións ou os seus edificios.

Así e todo houbo persoas que mantiveron a loita polos valores republicanos; unha mostra desa loita é Camilo: o último guerrilleiro de Galicia. A súa vida recollese nun documental que en palabras dos seus autores:

"Camilo: o último guerrilleiro de Galicia nace do sentido do deber para coa memoria democrática, (...).

Neste marco, vemos en Camilo de Dios non só ao último guerrilleiro vivo de Galicia, senón a unha traxectoria histórica continuada que vai dende a formación do movemento obreiro e campesiño na Limia até os nosos días: a persecución, a supervivencia, o afastamento familiar e mesmo a morte forman parte dunha vida movida polos soños dun mundo mellor."

O IEAMSo (Instituto de Estudos Agrarios Mártires de Sobredo) naceu co obxectivo de manter vivos na memoria os sucesos acontecidos en Sobredo en 1922, enmarcados na loita agraria e que rematarían coa redención dos foros, difundir o coñecemento destes feitos e situar esa loita e ese movemento asociativo na actualidade. Desexamos traer Sobredo á actualidade e reivindicarmos os valores solidarios e construtivos na procura dunha vida máis xusta que moveron á sociedade daquela época.

Para mantermos vivos estes valores, coñecermos o noso pasado e sabermos quen somos na actualidade, organizamos a proxección de
"Camilo: o último guerrilleiro de Galicia; para a que contamos coa participación dos autores do documental.

Invitámosvos a participar e agardámosvos na sala de conferencias do edificio San Domingos, que está situado na Alameda de Tui, ás 20 horas do día 28 de abril.