Xuliva pendura na rede a súa última conferencia sobre Megalitismo

Por unha banda, o profesor Antón Rodríguez Casal abriu a súa quenda precisando conceptos como o do propio megalitismo (as diferenzas con termos como monumentalidade), situandoo como un fenómeno universal de hai cinco mil ou seis mil anos, no cal Galiza formaría parte do contexto atlántico que abrangue dende as illas Orcadas até o Sur de Portugal.
Posteriormente pasaría a percorrrer os principais centros megalíticos europeos tales como o Stonehege en Inglaterra, Carnac en Bretaña ou Newgrange en Irlanda. O profesor comentou tamén as principais teorías a redor da formación destes megalitos e as similitudes entre os diferentes puntos sen que houbese un contacto deliberado entre eles. Tamén insistiu na inmensa cantidade de pequenas mámoas que caracterizan historicamente a paisaxe galega, así como a súa mala conservación co paso do tempo, en gran parte debida a un fondo descoñecemento das mesmas.

En segundo lugar, Miguel Carrero analizou concretamente a situación de restos megalíticos no sur do país e no norte de Portugal. Sinalou que se cuantifican 43 monumentos megalíticos na comarca do Baixo Miño, aínda que con certeza, o número podería ser maior. Tamén comentou as alteracións paisaxísticas que sofren as mámoas e megalitos co paso dos anos, o que adoita conlevar un deterioro grave das mesmas. Debido a isto, a dificultade de identificar estes megalitos é maior, polo que o profesor Carrero subliñou a importancia da tecnoloxía LIDAR na actualidade no seu traballo para seguir investigando sobre os vestixios milenarios do noso entorno.