Xuliva pendura na rede o documentario -Reconstruíndo a autoestima-

O documentario, que foi proxectado o pasado xoves 16 a raíz da conmemoración do Día das Letras Galegas, pretende amosarnos a través de diversas entrevistas a veciñas e veciños da Guarda as diferentes percepcións e realidades entorno ao galego na nosa vila. As persoas entrevistadas comentaron cuestións como; a súa lingua de uso habitual, a identificación con cada unha, a situación actual e as oportunidades que nos brindan, a persecución do galego no pasado, a presenza da nosa lingua na escola, o seu futuro, etc.

Esta proxección, que tivo lugar no Centro Cultural da Guarda, foi parte, xunto cunha intervención de Denís Vicente, mestre e impulsor do documentario, e un posterior coloquio aberto entre os/as asistentes, da primeira actividade do colectivo Xuliva. Este novo proxecto está composto por un conxunto de mozas e mozos guardeses que pula por poñer en valor, entre todas as xeracións, o patrimonio material e inmaterial da vila. Proximamente o colectivo presentará novas actividades que xa está a organizar.