-Degusta europa- chega a Tui cun menú elaborado pola Escola de hostaleria Manuel Antonio de Vigo

Carmela Silva informou que Tui, "como corazón e porta de entrada do Camiño Portugués tradicional, o que máis visitantes ten de toda a provincia, tiña que ter un papel protagonista en Degusta Europa". Neste contexto, o alumnado da escola de hostalería Manuel Antonio de Vigo foi o encargado de cociñar en directo, ante a atenta mirada das persoas visitantes do mercado, 5 tapas diferentes elaboradas con produtos que foron adquiridos no propio mercado da vila: buñuelos de bacallau con crema de cabazo, anguías de Pontesampaio en tempura, arroz cremoso de chocos de Redondela, rabo de tenreira estufado ao viño de Oporto en pan de chapata e natas de Belem.

A aposta da Deputación de Pontevedra polo Camiño Portugués tradicional e por Tui continuará nas vindeiras semanas. Así, a Presidenta da institución provincial adiantou que o vindeiro 8 de maio terá lugar no concello un acto "no que dará a coñecer a promoción que realizará a Deputación de Pontevedra sobre o Camiño Portugués tradicional e sobre Tui como corazón desta ruta". Ao respecto, o alcalde de Tui, Enrique Cabaleiro, agradeceu á institución provincial a axuda que está a prestar aos concellos así como a posta en marcha de actuacións "como este programa que conxuga tanto gastronomía, máis nun espazo físico como é a Praza de Abastos que está a pasar por un momento de difícil viabilidade, como o Camiño Portugués tradicional, tan importante para Tui".

"Degusta Europa. Gastronomía no Camiño", que o pasado ano repartiu arredor de 10.000 tapas entre milleiros de persoas, está a percorrer diferentes concellos da provincia de Pontevedra que son puntos neurálxicos dos camiños cara Compostela. O programa, que comezou onte en Vigo e continuou esta mañá en Tui, seguirá nas próximas semanas nos mercados de Baiona (mércores, 3 de maio de 11 a 12), Pontevedra (venres, 5 de maio de 11 a 12), O Grove (xoves 11 de maio de 11 a 12) e Soutomaior (12 de maio de 12 a 13).