Tomiño inaugura un dos maiores skatepark da provincia

O sábado 2 de outubro, despois de ter sido adiada por mor da climatoloxía, tivo lugar a inauguración da nova área de espazos deportivos situada na Alameda de Goián, que está composta por unha pista de skatepark e unha pista polideportiva. O novo espazo está encadrado dentro do proxecto “Máis Goián”, un proxecto integral de reforma urbana que procura conectar todos os equipamentos públicos da vila a través da mobilidade peonil, e ven a complementar outros equipamentos deportivos situados na área como o campo de Fútbol do Regatiño ou o pavillón de Goián.

O acto será aberto ao público, comezou ás 13:00 e contou coa intervención de Uxío Benítez, 1º tenente alcalde e deputado provincial de Mobilidade e Espazo Público; Teo López, representante do colectivo local OG Rippers; Sandra González, alcaldesa de Tomiño e Carmela Silva, presidenta da Deputación de Pontevedra.

Debido novamente á climatoloxía, a exhibición prevista realizaráse na vindeira fin de semana coas diferentes modalidades que poderán practicarse na pista, tales como BMX, Skateboard, Scooter ou Roller.

O ámbito da intervención, financiada a través do Plan Concellos 2020, abarca uns 4.000 metros cadrados, dos cales preto de 1.400 corresponden ao skatepark, converténdoo nun dos maiores da provincia. No seu deseño contouse co asesoramento de expertos nestes deportes, participando no seu deseño un dos técnicos organizadores do recoñecido evento de cultura urbana e deportes extremos “O Marisquiño”, ademais de ser fundamental en todo o proceso a participación da mocidade do municipio que practica algunha destas modalidades.