-Unicorn wars-, un filme de animación antibelicista, próxima entrega do Ciclo de Cine Mestre Mateo

O filme de animación “Unicorn wars”, que se emitirá este venres 10 de novembro ás 20:30h. no Centro Cultural, foi sen dúbida unha película revelación no panorama da animación española no ano 2022. Dirixida polo galego Alberto Vázquez, esta película  envolta no aparente candor da animación infantil e dos seus protagonistas: o exército osiño, se presenta como unha acérrima fábula antibélica, pero sen escatimar na crueldade descarnada propia dos conflitos bélicos, facendo unha crítica do  absurdo da guerra, do negocio das bandeiras e do sangue dos mozos que as defenden. É por todo isto que Unicorn wars non é un filme para nenos, senón para público adulto e tamén xuvenil, especialmente aquel acostumado á linguaxe dos videoxogos, dos cómics e do anime. Trátase dun filme duro e violento, non recomendado para menores de 16 anos, que  utiliza toda a violencia na trama e nas imaxes para facer unha lectura que sen dúbida non deixará indiferente ao espectador.

O seu director conseguiu por esta película o premio na XX Edición dos Mestre Mateo (2023), así como Goya á mellor película de animación no 2022. Galardón que xa obtivera no 2011 por Birdboy, na versión de curtametraxe.

Este filme é a sexta entrega do ciclo de cinema Mestre Mateo que, promovido dende a Academia Galega do audiovisual e coa colaboración das Deputacións Provinciais, quere achegar aos diferentes puntos da xeografía galega unha mostra representativa das últimas producións cinematográficas galegas.

FICHA-RESUMO DA ACTIVIDADE

ACTIVIDADE: CICLO CINEMA GALEGO MESTRE MATEO

LUGAR:  CENTRO CULTURAL A GUARDA

DATA E HORARIO: 10/11/23 ÁS 20:30H.

ORGANIZA: Academia Galega do Audiovisual, Deputación de Pontevedra e Concello da Guarda

MAIS INFORMACIÓN: cultura@aguarda.es, https://ciclomestremateo.gal/,  https://www.unicornwarsthefilm.com/