A DEPUTACIÓN APOIA A GALA DO PATRIMONIO 2015 DE -PONTE NAS ONDAS- QUE SE CELEBRARÁ NO MUNICIPIO DE TUI

O deputado provincial de Cultura e Normalización Lingüística, Xosé Leal, mantivo unha xuntanza co presidente da Asociación Cultural e Pedagóxica 'Ponte nas Ondas', Santiago Veloso, para establecer as vías de colaboración do ente provincial coas actividades que se realizan desde esta Asociación para promover o patrimonio inmaterial galego-portugués. Tras a xuntanza, Xosé Leal trasladoulle a Santiago Veloso o seu compromiso de colaboración para coas actividades que se realizarán o 25 de novembro no Teatro Municipal de Tui, dirixidas tanto a centros educativos de ambas beiras do Miño como ao público xeral. O deputado provincial afirmou que esta colaboración se enmarca "na aposta que queremos facer por fomentar as relacións a nivel lingüístico nunha zona xeográfica na que as relacións neste ámbito son moi estreitas, e tendo en conta que ademais é unha iniciativa que implica a cooperación entre centros educativos tanto galegos como portugueses e, por conseguinte, fomenta o papel da mocidade na transmisión dos valores da oralidade de dous idiomas irmáns".
A Asociación 'Ponte nas Ondas' escolle o 25 de novembro como data conmemorativa de que, hai dez anos, o patrimonio inmaterial galego-porltugués optaba a ser proclamado pola UNESCO como Obra Mestra do Patrimonio da Humanidade, converténdose na primeira candidatura multinacional promovida por centros educativos de dous países da Unión Europea. A pesares de que non foi proclamada, a Unesco recomendou volver a presentar a proposta atendendo ao gran valor e riqueza das manifestacións e expresións deste patrimonio.
No 25 de novembro deste ano celebrarase a Mostra de Oralidade Galego-Portuguesa baixo a denominación 'Temos Patrimonio!' dirixida a alumnado de centros educativos e que terá lugar pola mañá, ás 11:30h, no Teatro Municipal de Tui. A través desta actividade porase en valor entre os máis novos e as máis novas a tradición oral de ambos lados da fronteira, con especial incidencia nos aspectos comúns e en como se mantén viva na actualidade. No evento participarán o escritor e músico Xurxo Souto, o grupo de música tradicional Tradisón, o grupo de música infantil galego Gramola Gominola e Os tres irmaos e outras historias de amor.
En horario de tarde, ás 20:30 horas e tamén no Teatro Municipal de Tui, celebrarase a Gala do Patrimonio, que dá cabida a persoas e grupos que se consideran 'portadoras' do valor do patrimonio inmaterial galego-portugués por todo o mundo. O cartel está composto por Malvela, un grupo de mulleres raianas que interpretan cancións tradicionais, o quinteto de Porto 'Vozes da Ràdio', as cantadeiras do Minho 'Cantadeiras do Neiva', o actor e director teatral 'Quico Cadaval', a cantautora galega 'Uxía', o músico brasileiro 'augusto Canario', e o escritor e músico galego 'Xurxo Souto'.
'Ponte nas ondas' nacera como unha experiencia educativa no ano 1995, grazas á cooperación entre escolas de ensino básico situadas nas dúas beiras do Miño. Comezara como unha xornada radiofónica de 12 horas de emisión que, co tempo, pasou a ter 24 horas de programación na que estudantes de centros educativos de primaria, secundaria e da universidade emiten programas de radio elaborados por eles mesmos en directo e atendendo a todo tipo de formatos, desde concursos e música ata entrevistas e conexións entre diferentes estudos.
Esta iniciativa conta con numerosos recoñecementos entre os que se contan o Premio Galicia de Comunicación ao 'mellor labor en medios informativos', concedido pola Xunta de Galicia; o premio 'Bos e Xenerosos' concedido pola Asociación de Escritores en Lingua Galega; e o recoñecemento da European Bureau for Lesser USed Languages (EBLUL) como experiencia que contribúe á promoción dunha lingua, axuda á recuperación da cultura e das tradicións e favorece a cooperación transfronteiriza.