A DEPUTACIÓN ASESORARÁ AO CONCELLO DE TUI PARA RECUPERAR O CENTRO HISTÓRICO DA VILA

O asesor provincial en materia de Mobilidade, Jesús Fole, visitou o Concello de Tui para falar das posibilidades de reforma e mellora da vila dende o punto de vista da mobilidade e accesibilidade. Entre outras cuestións, Fole ofreceu a colaboración da Deputación de Pontevedra para poñer en marcha a recuperación do centro histórico, do núcleo de Baños, do desdobramento da estrada de acceso ao núcleo urbano, así como para o asesoramento na creación dunha senda fluvial paralela ao Miño que una o centro da vila coa localidade de Caldelas.

Fole foi recibido na Casa do Concello polo alcalde de Tui, Enrique Cabaleiro, e o concelleiro responsable do casco vello, José Martínez Tato. Posteriormente o técnico e os representantes municipais visitaron diferentes zonas da vila e do núcleo de Baños, comentando sobre o terreo diferentes posibilidades de actuación.

Cabaleiro e Martínez Tato plantexaron a Fole unha proposta de actuación ambiciosa con respecto ao centro histórico, na que o primeiro eixo de actuación pasará por restrinxir a circulación rodada, tal e como se fixo na cidade de Pontevedra en 1999. "No casco antigo de Tui hai moito por facer. É magnífico, pero a día de hoxe é un desastre, xa que hai coches aparcados diante de tódolos edificios emblemáticos. Como primeira actuación hai que pechar o tráfico ao transporte privado; deixar acceder aos servizos, pero non aparcar", sinalou o técnico provincial.

Na segunda parte da visita de Jesús Fole a Tui, o técnico coñeceu o núcleo de Caldelas, onde teñen sona as augas mediciñais e no que existe un apeadeiro de Renfe en desuso, unha igrexa, así como áreas de xogos e de ximnasia e unha zona de esparcemento que actualmente presentan un importante deterioro e unha escasa calidade urbana. Como proposta, Jesús Fole, plantexou a posibilidade de mellorar os espazos cunha actuación básica e crear unha senda peonil na ribeira do Miño entre o casco urbano de Tui e Baños, facendo algo similar ao que xa existe na marxe portuguesa do río, o que alí se chama unha 'ecopista'. "A ecopista da zona de Portugal está chea de españois que van pasar alí o día e a zona galega está baleira. Hai que ver como tratan os espazos urbanos en Portugal e como se están tratando aquí", indicou, para salientar que dende a Unión Europea se porán fondos a disposición para localidades transfronteirizas nos vindeiros anos, "o que se podería aproveitar para dinamizar o contorno da zona do Miño" dentro do proxecto Uniminho.

Fole tamén foi receptivo con outras actuacións propostas polos integrantes do goberno local de Tui, tales como a posibilidade de desdobrar a actual entrada á vila, recuperar a conexión directa con Portugal a través da antiga ponte de estrutura metálica e elaborar outras vías biosaudables O técnico tamén tomou nota da petición de mellora da vía provincial que une Baños con Salceda de Caselas (EP-2505), na que hai serios problemas de seguranza viaria.