A DEPUTACIÓN DE PONTEVEDRA INSTALA MÁIS DE 200 LUMINARIAS LED EN 6 CONCELLOS DA PROVINCIA

A Deputación de Pontevedra continúa cos traballos para a optimización da iluminación exterior pública nos concellos da provincia. Na actulidade,  en Tui, A Estrada, Ribadumia, Nigrán, Meis e Agolada xa se cambiaron  máis de 200 lámpadas de vapor de sodio por outras novas LED.

 Estes seis  concellos participan na proba piloto de iluminación pública coa que se quere recoller os datos e medicións que permitan establecer accións orientadas a mellorar e facer un uso máis eficiente da enerxía. Accións  que no futuro serán aplicables a todos os municipios da provincia.

Proba piloto en 6 concellos

Con estas tarefas de control lumínico estase a realizar un estudo técnico que ten como finalidade axustar as potencias de iluminación ás necesidades reais, mediante o emprego de tecnoloxía de alta eficiencia LED.

Os novos puntos de luz son controlados individualmente e en remoto (tanto o consumo coma o arranque e apagamento e as avarías) e  os cadros xerais da iluminación se someten a un rigoroso seguimento mediante a instlación e dispositivos de monitorización, e outras ferramentas de telexestión que permiten programar os horarios de acendido e apagado e regular a intensidade lumínica.

200 lámpadas LED para optimizar o gasto

Os datos de consumo que se recollen refírense ás novas lámpadas LED xa instaladas (200) e que permitiron  reducir a  potencia de consumo entre o 51 % e o 80 %.

Coa análise dos datos que se realiza destas lámpadas defínense  as accións coas que diminuír os custos de funcionamento das instalacións de iluminación pública e que lles permite as concellos son  optimizar o gasto enerxético neste ámbito.

Estes novos puntos de luz están conectados a un único cadro de iluminación pública, onde se concentran os instrumentos de control e de telexestión, cuxa regulación punto a punto permite maximizar os aforros de enerxía e a eficiencia no mantemento.

Os datos que se capturan nesta proba piloto envíanse a unha plataforma tecnolóxica de última xeración, baseada no concepto IoT (Internet of Things), con capacidade de xestión e mellora das actividades de operación e mantemento.

Proxecto "depoGAP"

Esta iniciativa insírese no proxecto "depoGAP", promovido pola Deputación de Pontevedra e cofinanciado nun 70 % a través de fondos europeos Feder.

DepoGap quere promover un novo modelo de xestión dos activos públicos a través das novas tecnoloxías e coa colaboración e participación cidadá.