A ED VAL MIÑOR GAÑA O I TORNEO INFANTIL -DÍA DAS LETRAS GALEGAS 2016 ? MANUEL MARÍA-

A ED Val Miñor impúxose na final por 2 goles a 0 a un Oiense CF que propuxo unha defensa case imposible de bater durante todo o campionato. Púñase de manifesto finalmente a superioridade do equipo do Val Miñor que estivo latente durante todo o campionato por máis que os resultados case sempre fosen axustados.

Nunha xornada na que o bo tempo e o bo ánimo nas gradas e no campo axudaron a que o torneo transcorrese nun ambiente festivo, predominou a igualdade nos encontros ao longo de toda a competición. Os nosos representantes, os Infantís AD, quedaron a un paso de acceder á segunda fase pero non puideron impoñerse aos que, ao termo, serían os dous finalistas.

A AD Tomiño quere agradecer ao Concello de Tomiño, aos equipos Erizana CF, Gondomar FB, Sporting Guardés, UD A Guía Guardesa, CF Oiense, ED Val Miñor e Racing Vilariño así como ao numeroso público presente ao longo de todo o día, a súa participación e inestimable colaboración para facer desta primeira edición do torneo un éxito que, agardamos, se repita o vindeiro ano.