A Guarda mellora o campo da Sangriña con novas instalacións e accesibilidade

O campo municipal de fútbol da Sangriña atópase en proceso de mellora das súas instalacións coa construción dunha nova pasarela accesible, así como a renovación da cantina e do almacén da entrada.

A principal novidade será a pasarela que conectará a entrada coas gradas, permitindo un acceso máis cómodo e seguro para persoas con mobilidade reducida, usuarios de cadeiras de rodas e familias con carriños infantís.

Con esta actuación, o Concello da Guarda reforza a súa aposta pola mellora dos espazos deportivos municipais, non só para favorecer a práctica do deporte, senón tamén para garantir unha experiencia máis inclusiva e cómoda a espectadores e familias que acoden a apoiar aos equipos locais.

“Estamos moi contentos de poder darlle esta renovación ás instalacións do campo da Sangriña, pois é un punto de encontro para desfrutar do deporte e debe ser accesible para todos e todas”, sinalou o alcalde.

O campo da Sangriña é actualmente a sede da Unión Guardesa, do Sporting Guardés e do equipo de fútbol gaélico Gróvias F.G., polo que esta mellora beneficiará a centos de xogadores e afeccionados.

A intervención conta cun orzamento total de 118.512,99 euros, dos cales 69.715,10 euros proceden dunha subvención do Plan Extraordinario de Infraestruturas Deportivas da Deputación de Pontevedra, mentres que os 48.797,89 euros restantes son achega do Concello da Guarda.