Ardeu palla e madeira no alpendre de Tomiño afectado por un incendio

Foi pouco antes das catro da tarde cando un veciño contactaba co 112 Galicia para pedir axuda por mor dun incendio orixinado nunha palleira a carón dunha casa. Ningún ocupante da vivenda resultou afectado, pero si un bombeiro que participaba nas tarefas de extinción e sufriu un golpe de calor. O traballador foi atendido no punto por un equipo médico e, finalmente, non necesitou ser evacuado.

Mentres, os compañeiros continuaban traballando para sufocar o incendio, para o que contaron coa colaboración dos GES da Guarda e Ponteareas, así como cos Bombeiros de Ribadumia. Tamén foron informados os Bombeiros de Vigo

Deste xeito, preto das once da noite os efectivos de emerxencias deron por extinguido o lume que devorou o interior do alpendre e obrigou aos bombeiros a facer un burato na parede para liberar de carga a estrutura. Pese a intensidade do incendio, o alpendre apenas sufriu danos.

Un bombeiro recibiu asistencia médica mentres trataba de apagar un incendio nunha palleira en Tomiño

Os servizos sanitarios de urxencia atenderon esta tarde a un bombeiro que resultou afectado polo fume e a calor mentres trataba de sufocar un incendio declarado nunha palleira en Tomiño.

Sucedeu sobre as catro desta tarde, despois de iniciarse un lume nunha palleira na que almacenan alpacas e diversa maquinaria agrícola situada no lugar de Cristelos. Tamén había animais, mais, segundo indicaron os particulares ao 112 Galicia, foron retirados da estrutura, así como as máquinas e outros enseres. Ninguén da casa resultou afectado, pero si un bombeiro que puido sufrir un golpe de calor mentres trataba de apagar as lapas.

Deste xeito, o home recibiu asistencia no mesmo lugar do incendio e non foi necesario o seu traslado. Mentres, os demais compañeiros do parque do Baixo Miño continúan traballando para sufocar as lapas coa colaboración de efectivos do GES da Guarda e Ponteareas e os Bombeiros de Ribadumia. Tamén foron informados os Bombeiros de Vigo e os membros do GES do Val Miñor.

Igualmente, desde o 112 Galicia, pediuse a axuda dos axentes da Garda Civil e dos voluntarios de Protección Civil da localidade.