Arrancan as obras de reforma do Mercado de San Antonio en Tui cun investimento de 750.000 euros

Este luns, 4 de novembro, iniciaranse en Tui as obras de acondicionamento da contorna do Mercado de San Antonio, unha reforma integral que suporá un investimento de 754.292,10 euros financiado a través do Plan de Recuperación, Transformación e Resiliencia. A empresa Xestión Ambiental de Contratas SL executará o proxecto, cun prazo previsto de dous meses e medio para a súa finalización.

A actuación céntrase na humanización e mellora das rúas O Pilar e Maristas, co obxectivo de integrar o mercado co seu entorno, tanto en estética coma en funcionalidade. Ademais, renovarase o mobiliario urbano, a sinalización e a iluminación, dándolle un novo aspecto á zona e mellorando os servizos para veciños, comerciantes e visitantes.

O proxecto tamén inclúe importantes melloras como a ordenación do aparcamento traseiro, unha nova dársena para carga e descarga, así como un espazo adaptado para a recollida de residuos. Outro punto destacado será a instalación dunha estación de recarga de vehículos eléctricos, que contribuirá á sostibilidade e modernización da área.

Tamén está prevista a instalación dun graderío cuberto na praza exterior do mercado, pensado para acoller eventos e actividades ao aire libre. Ademais, o mercado contará con taquillas refrixerantes para mellorar a conservación dos produtos á venda, mentres que a praza beneficiará dun alumeado máis eficiente e do soterramento do cableado, garantindo unha contorna máis segura e visualmente atractiva.

Durante a execución das obras, haberá restricións puntuais no tráfico e nos accesos para carga e descarga. Estas limitacións estarán debidamente sinalizadas para minimizar o impacto nas actividades comerciais e facilitar o desprazamento da veciñanza.