Danza e humor danse a man no espectáculo -Sofá-, este xoves no Auditorio de San Benito da Guarda

A bailarina Marta Alonso e o cómico Pablo Reboleiro únense na novidosa comedia "Sofá", que nos fala da rutina diaria a través das artes do corpo e movemento e que chega na xornada deste xoves día 14 de xullo ás 20:30h ao Auditorio de San Benito da Guarda.

O espectáculo, apto para todo tipo de públicos e idades, fala dunha parella e do seu sofá, ese lugar no que descansan e esquecen o que está fóra. A parella son Marta e Pablo, dúas persoas normais nun mundo cun traballo mal remunerado, guerra, ameazas nucleares, catástrofes ecolóxicas, virus asasinos invisibles, normas arbitrarias, pobreza, esgotamento. Motivos polos que Pablo e Marta están enfermos de cansazo e aburrimento, pero téñense a unha ó outro, teñen un sofá, e saben bailar.

O sofá, que comeza a función no chan, irase elevando a varios metros de altura, segundo se vai elevando o ritmo do espectáculo. A través da escolla desta proposta, A Guarda fará a súa pre-estrea de teatro e danza realizados en espazos non convencionais.

A peza forma parte da programación MIÚDO VERÁN, que cada xoves presenta ante o público guardés unha cita cultural pensada para gozar en familia. De entre as propostas desta programación esta vai dirixida ao público xuvenil e adulto pola temática abordada, aínda que poden acudir acompañados dos mais pequenos que poderán rir coas ocorrencias de Pablo e a danza de humor.

"Sofá" e Marta Alonso Tejada

Marta Alonso Tejada leva mais de 15 anos adicada á danza e as artes escénicas, liderando diferentes proxectos entre o ballet clásico, a danza actual, a danza en movemento e o teatro. No 2020 monta a súa propia compañía co proxecto Bailar Agora, que unifica danza, humor e teatro e agora nos presenta este novo espectáculo na mesma liña e pensado para espazos non convenicionais.

Sofá foi creado en residencia artística no Concello de Outes, no que realizou a súa estrea no pasado mes de maio. Esta semana terá a súa “posta de largo” no MIT RIBADAVIA (Mostra Internacional de Teatro de Ribadavia), pero antes recalará na Guarda buscando eses espazos alternativos ás salas teatrais.