David Regades esixe á Xunta e Goberno medidas urxentes para paliar a situación das familias de Tui

Así o destacou o pasado sábado Regades na súa visita a "zona cero" da explosión xunto a presidenta da Deputación, Carmela Silva, e o secretario xeral, Gonzalo Caballero. David Regades subliñou tamén o seu apoio as reclamacións dos veciños e veciñas e anunciou a presentación dunha moción na Deputación e nos concellos da provincia esixindo á Xunta e Goberno medidas reais e urxentes para os damnificados.

O secretario xeral considerou que tanto a Xunta como o Goberno deben garantir de inmediato unha vivenda as persoas afectadas xa que na zona non existe as suficientes vivendas en aluguer para acollelos a todos. Igualmente débese habilitar unha partida económica para que os veciños e veciñas que o perderon todo no estoupido podan facer fronte as súas necesidades básicas "sen ter que estar a vivir da caridade e da solidariedade de outros veciños e veciñas".

Regades esixe tamén á Xunta e Goberno que poñan a disposición do concello de Tui os recursos materiais, técnicos e humanos para que poda dar unha resposta rápida á situación urbanística na que quedou a parroquia de Paramos. E, por último, asumir a reconstrución das vivendas afectadas polo estoupido e non simplemente facilitar "créditos que logo a veciñanza ten que devolver e asumir o seu pago ante Facenda".