Dobre cita cultural na Guarda para o sábado 28 de maio

Un contacontos adicado á Florencio Delgado Gurriarán e a obra teatral #2Pilgrims poñen o broche á programación de maio.

Este sábado realizarase na Biblioteca Municipal o contacontos das Letras Galegas “Florencio nas Ondas”, a cargo da narradora Raquel Queizás, que tivo que adiarse da súa data orixinal por mor da choiva. Mediante a recreación dun antigo programa de radio descubriremos a vida de película deste personaxe, medio espía, medio fuxitivo, que contribuíu a dignificación de Galicia e a normalización da nosa fala nunha época escura.  O espectáculo apto para nenos a partir de 5 anos, representarase na Biblioteca Municipal ás 12:00h, sendo preciso confirmar a asistencia previamente no Centro Cultural: centrocultural@aguarda.esou no teléfono 986611850 en horario de 16:00h. a 21:00h.

O mesmo sábado á tardiña, ás 20:00h. o Centro Cultural acollerá unha nova obra teatral , neste caso a última proposta de Redrum Teatro: “#2Pilgrims”. A obra aborda o proceso de creación dunha obra teatral a cargo de dous recoñecidos actores como son Sheyla Fariña e Guillermo Carbajo, o Camiño de Santiago será a escusa ou detonante que os protagonistas atopen para iniciar a súa reflexión, na que os temas como a igualdade ou as novas masculinidades formarán parte das súas preocupacións principais.

Esta obra, a decimo quinta da compañía - que xa estivo na Guarda con creacións como Noiteboa, Invisibles ou O Home con Lentes de pasta- está especialmente pensada para o público mais novo e incluso adolescente. A compañía quixo facer un esforzo por dirixirse á mocidade cunha comedia que conta con grandes doses de absurdo e que fai un cuestionamento crítico sobre o amor romántico, así como unha reflexión acerca do efecto das redes sociais nas relacións persoais.

O acceso será de balde ate completar o aforo máximo do Salón de Actos, non sendo precisa a inscrición previa.