EDUCACIÓN E CONCELLO DA GUARDA ACORDAN A EXECUCIÓN CONXUNTA DA CUBERTA DO POLIDEPORTIVO DE AS SOLANAS

Durante o encontro, tanto dende a Xunta de Galicia como dende o concello da Guarda, coincidiron na necesidade de mellora do tellado do pavillón deste colexio por cuestións de seguridade. "Somos conscientes de que se trata dunha obra prioritaria", explicou Pérez Ares, "polo que analizamos a colaboración entre as dúas administracións para afrontar economicamente estes traballos ao longo do próximo ano".

Entre os temas que se puxeron hoxe sobre a mesa atopáronse as cuestións técnicas, económicas e financeiras do proxecto. "Nos próximos días os responsables da Unidade Técnica se acercarán ata o polideportivo para avaliar o custo económico da obra, xa que, ademais, tamén hai que incluír o cambio dos lucernarios dunha das fachadas que se atopan en mal estado", engadiu o xefe territorial.

"O edificio é de titularidade municipal", matizou César Pérez, "pero os nenos do colexio utilizan estas instalacións en horas lectivas, polo que creemos que, como administración, debemos colaborar. Agora ben, agardamos tamén poder contar co apoio da Deputación de Pontevedra como xa ocorreu recentemente, tendo en conta que coa colaboración de todas as administracións seremos capaces de facer máis".

A Consellería de Cultura e Educación investiu nos últimos anos máis de 700.000 euros nos centros deste concello, tanto en Primaria coma en Secundaria, destacando a reforma da cuberta do patio do CEIP Sangriña e as obras de mellora de baixantes no CEIP Rodríguez Sinde.