ESPECIAL - A Guarda conta xa cun Centro de Interpretación no Castelo de Santa Cruz

O complexo do Castelo de Santa Cruz está declarado como Ben de Interese Cultural de Galicia, na súa categoría de monumento. Polo tanto, trátase dun ben que, polo seu recoñecido valor propio, é considerado como de interese relevante para a permanencia e a identidade da cultura galega a través do tempo.

A este importante acto acudiron numerosas autoridades como o alcalde da Guarda, Antonio Lomba Baz; a concelleira de Turismo, Montse Magallanes; o concelleiro de Patrimonio, Javier Crespo; a concelleira de Servizo Sociais Mª Teresa Vicente; o Xefe Territorial da Consellería de Cultura da Xunta de Galicia, César Pérez Ares e o deputado provincial de Cooperación pola Deputación de Pontevedra, David Regades.

Durante a inauguración deste Centro de Interpretación houbo numerosos momentos para o agradecemento. Na súa intervención o alcalde da Guarda quixo destacar a labor dos anteriores rexidores e do concelleiro de Patrimonio, Javier Crespo, cuxo incansable traballo na busca de apoios fixo posible que chegara este día. Ademais, quixo recoñecer a labor da arqueóloga Rebeca Blanco, encargada da musealización do Centro e experta en fortificacións que traballou con pasión neste proxecto sentíndollo como propio.

Tampouco se quixo perder este acto Felipe Criado Boado, presidente da Asociación Europea de Arqueólogos e director do Incipit (Instituto de Ciencias do Patrimonio), que formaba parte do equipo de traballo de Rebeca. Felipe agradeceu a labor do actual e do anterior alcalde da Guarda e da propia arquitecta, nunha colaboración que permitiu conxugar ciencia e política, única maneira, afirmou, de dar valor ó realmente importante: os contidos.

Pola súa parte Rebeca Blanco mostrouse emocionada de ver o froito do traballo de moitos anos, que no seu momento presentou tamén en forma de tese doctoral. Tamén explicou un pouco o seu traballo e o funcionamento do Centro, que acolle unha exposición na primeira planta. Esta conta con tres bloques temáticos: o primeiro contextualiza o espazo xeográfico e a construción da fortificación na Guerra da Restauraçao Portuguesa (s. XVII). O segundo bloque está centrado na Guarda, no nacemento e evolución da vila e nos sistemas defensivos que nela se desenvolveron. E por último, un terceiro bloque sobre a fortificación na fronteira entre Portugal e Galicia e as diversas fortificacións existentes. Tratouse de dar forma a unha mostra didáctica e amena, centrada na forza das súas imaxes. Por outra parte, a planta baixa estará adicada a distintos talleres e actividades.

Deste xeito queda inaugurada a terceira pata da Rede de Museos da Guarda xunto ó MASAT, ubicado no Monte Santa Trega e o Museo do Mar. Os tres emprazamentos compleméntanse para ofrecer non só unha ollada ao numeroso patrimonio da Guarda, senón que compoñen un completo percorrido pola historia da vila, dende a Idade do Ferro ata os nosos días.

O concello non pode máis que reiterar os agradecementos expresados na inauguración e convidar a todo o mundo a visitar este Centro de Interpretación, que estará aberto as fins de semanas e os festivos; e o Castelo de Santa Cruz, aberto todos os días o público, un ben do patrimonio da Guarda que paga a pena coñecer.

Co novo Centro de Interpretación complétanse os traballos de recuperación e posta en valor do Castelo de Santa Cruz. Trátase dun recinto fortificado do século XVII que durante máis de 150 anos estivo en mans privadas e practicamente abandonado e que dende fai uns anos se ten recuperado e acondicionado grazas á cooperación e traballo en común entre as distintas Administracións.