Máis de 100 escolares daranse cita este sábado en Tomiño no Campionato Provincial de Tenis de Mesa

Á presentación acudiron o coordinador Provincial de Deportes, Guillermo Reinaldo; o presidente de Agrudebam, Alfonso Lorenzo; o presidente e máis o secretario do Club de Tenis de Mesa Monteferreiros, Jacinto Fernández e Lino González, respectivamente, e por último, o concelleiro de Deportes do Concello, Ismael Troncoso.

Nas xornadas competirán 114 xogadores escolares e federados; a maioría procedentes das comarcas do Baixo Miño e Val Miñor. Acudirán participantes de varios colexios e clubs da provincia, xa que se trata dunha xornada na que se pretende promocionar este deporte, como remate ás competicións celebradas nas diferentes comarcas.

A competición, que comezará ás 9.30 horas e rematará sobre as 14.00, contará con 16 mesas regulamentarias, nas que terán lugar máis de 250 partidos, arbitrados por tres árbitros profesionais e tamén algúns xogadores. Haberá medallas de ouro, prata e bronce para os tres primeiros clasificados de cada unha das categorías: benxamín, alevín, infantil e cadete.

O concelleiro de Deportes de Tomiño reiterou o apoio do Concello ao deporte de base e asegurou que "é un privilexio para nós que se organice esta proba no noso concello, máis aínda cando se trata dun deporte non maioritario, coma este".

Pola súa banda, o coordinador provincial de Deportes, explicou que a idea é promocionar o tenis de mesa na zona, polo que se enfrontarán xogadores escolares con outros xa federados, e agradeceu a colaboración na organización do campionato.

Normativa Campionato Provincial de Tenis de Mesa 2016/2017

Lugar: Pavillón do CEIP Sobrada. Tomiño

Data: Sábado, 20 de maio de 2017

1. CATEGORÍAS:

BENXAMÍN: nados nos anos 2008-2007. ALEVÍN: nados nos anos 2006-2005. INFANTIL: nados nos anos 2004-2003. CADETE: nados nos anos 2002-2001.

2. PARTICIPANTES:

Poderán participar neste Campionato Provincial Escolar do programa XOGADE, todos os clubs, asociacións, centros de ensino e ANPAS, nas categorías benxamín, alevín, infantil e cadete.

3. SISTEMA DE COMPETICIÓN:

O sistema de competición será individual. Nas categorías benxamín e alevín, a competición será mixta.
As categorías infantil e cadete serán masculinas e femininas. (A competición pode ser mixta si hai pouca participación en algunha destas categorías, pero a clasificación final será diferenciada).

4. REGRAS DE XOGO :

A competición será individual para todas as categorías . Disputaranse os partidos ao mellor de 3 xogos, a 11 tantos ou diferenza de 2.
Disputarase a competición en fase de grupos e eliminatorias na procura da maioría dos postos.

5. LICENZAS:

Todos os participantes deben estar correctamente mutualizados na páxina de Xogade, no deporte bádminton, correspondente ao seu clube ou colexio.
Será obrigatoria a presentación do formulario de inscrición, por parte das entidades interesadas en participar. Na relación de xogadores federados, terase en conta o Ranking Galego da FGTM, nos escolares cada colexio fará as inscricións en orde de nivel dos xogadores da súa entidade, para organizar a competición.

6. INSCRICIÓNS:

Para o Campionato Provincial a inscrición será libre, e a competición será dirixida por un Xuíz Árbitro designado pola FGTM, adaptará a mesma ás inscricións recibidas.
O prazo de inscrición rematará o lúns, 15 de maio de 2017.

Remitirase a folla de inscrición, que figura no adxunto, antes das 16h do luns 15 de maio de 2017, ao correo, vinciostm@gmail.com con copia a coordinadordeporescolar.po@gmail.com

* No caso de precisar transporte, solicitalo en: transporte-xogade.pontevedra@xunta.gal