Nova achega do Plan Concellos para Tui por preto de 40.000 euros

O deputado de Cooperación, Carlos López Font, anunciou que a Deputación de Pontevedra vén de aprobar, mediante resolución presidencial, un novo investimento destinado ao concello de Tui ao abeiro do Plan Concellos 2018. Trátase esta vez dunha axuda de 37.691,86 para que a vila do Baixo Miño poida levar a cabo o proxecto de reactivación patrimonial "Rec-Tui", cuxo obxectivo é aproximar o patrimonio da vila á poboación residente, así como tamén ás persoas visitantes. Con esta iniciativa organizarase un proxecto educativo de catalogación colaborativa e elaborarase un informe de resultados do proceso e unhas liñas estratéxicas.

Ademais desta achega, o goberno provincial a través do Plan Concellos xa adxudicou anteriormente varias axudas para o municipio do Baixo Miño. En concreto, 543.874,49 euros na liña 1 destinados a financiar a elaboración de cartografía Six, ortofoto dixital e rede topográfica do concello; a área recreativa no C.R.A. Bornetas; mellora dos vestiarios no polideportivo municipal (vello); a construción da nave industrial para crear un garaxe de camións de recollida do lixo; a separación de augas pluviais e reparación de beirarrúas na estrada de Baiona; a mellora das pistas de tenis municipais en Areas-Tui; a substitución da cuberta na nave de maquinaria do concello,a área lúdico recreativa no CEIP Rebordonas, e a mellora da pavimentación no camiño de acceso ao núcleo da Malladoura.