O BNG de Tui denuncia a pasividade do Goberno municipal do PSOE en relación á problemática do colectivo de taxistas

En xullo de 2022, o BNG de Tui presentou unha moción en pleno na que solicitaba o traslado da parada de taxis a unha nova ubicación, propoñendo para iso a rúa Compostela, no tramo entre rúa Casal Aboi e Ourense, por estar máis perto das zonas de maior mobilidade da veciñanza (centro de saúde, mercado, paradas de autobús, etc.). Tamén solicitaran que se dotase a parada dunha zona cuberta.

Dita moción quedou enriba da mesa ante o compromiso do equipo de goberno de reunirse co colectivo de taxistas para tratar este problema. Tras unha primeira reunión de contacto, a día de hoxe, sete meses despois, o partido nacionalista denuncia que aínda non se avanzou "un milímetro" neste tema. De forma pouco seria e irresponsábel, neste tempo os membros do goberno local faltaron á cita programada alegando que "se esqueceran".

Para o BNG, "esta é unha mostra evidente do escaso interese e da súa pouca vontade de diálogo cos colectivos sociais, á que [o Goberno municipal] teñen acostumada á cidadanía tudense. O colectivo do taxi ten outros problemas que non están sendo abordados, como son, por exemplo, dotar a parada dun punto de luz".

Por todo isto, o BNG de Tui esixe ao Goberno local que tome os seus compromisos adquiridos coa seriedade que merecen e se reúna de forma urxente co colectivo de profesionais do sector do taxi en Tui para coñecer a súa problemática e avanzar na busca de solucións.