O BNG de Tui e Galiza Nova demandan que o edificio de Cam Fram sexa destinado a ser un centro polivalente social municipal e Casa da Mocidade

A organización Xuvenil demanda unha Casa da Mocidade inserida no conxunto dos múltiples usos sociais que teña o edificio. "A dia de hoxe, grazas a unha xestión pésima por parte do Partido Popular, a mocidade conta apenas cunha casa da xuventude totalmente en desuso e cuxas instalacións son incapaces de responder ás nosas necesidades." - Afirma Sergio Martínez, Responsábel Comarcal de Galiza Nova, que presentou en nome da organización esta mañá a proposta.

"A fin de contas, estásenos negando a nosa existencia colectiva, as mozas e mozos temos que contar con espazos para o desenvolvemento de proxectos e actividades, onde poder estar en contacto co noso tecido asociativo e cultural , e traballar as nosas capacidades creativas como unha forma de ocio alternativa." - engade.

Na súa proposta fan referencia a varios espazos dos que a mocidade podería facer uso, tais como salas de ensaio debidamente equipadas, salas de estudo, talleres para as diversas expresións artísticas, espazos de teatro ou de deporte urbano.

"No contexto actual, vemos de grande necesidade a construción destes espazos. Non só pola necesidade de un local de uso social no centro de Tui, realmente activo e á disposición da sociedade en xeral e de calquera colectivo que o precise, senón tamén como alternativa a unha sociedade cada vez mais individualista: o asociacionismo de base, sobre todo na mocidade é unha peza chave para a mellora colectiva. " - remata engadindo - "É unha oportunidade que non podemos deixar pasar."

A proposta será debatida no vindeiro pleno da Corporación Municipal, este Xoves, 28 de Novembro.