O Ceip Plurilingüe Nº2 de Tui da pasiños no camiño da Axenda 2030, dando continuidade ao proxecto de centro -Diver-xente-

O Ceip Plurilingüe Nº2 de Tui  segue a dar pasiños no camiño da Axenda 2030,  dando continuidade ao proxecto de centro “Diver-xente”. Aquí vos damos conta das actividades realizadas durante o mes de outubro e das previstas para o mes de novembro:

• Apertura da Biblioteca. Co gallo da conmemoración do Día das Bibliotecas Escolares o pasado 24 de outubro, levamos a cabo desde a nosa Biblioteca unha serie de actividades e dinamizacións relacionadas, non só co funcionamento e organización da mesma, senón tamén co proxecto que este curso se está a desenvolver a nivel centro. Comezamos esta celebración coa apertura da Biblio, presentando a todo o alumnado a nosa nova mascota “BIT”, un dato moi, pero que moi animado, a través dun vídeo explicativo elaborado polo equipo de profesores encargado, este curso, de dirixir as actividades da Biblioteca. Unha vez rematada a presentación, continuamos celebrando este día con xogos e actividades diversas: realización de debuxos da nova mascota, busca de libros dentro do propio espazo da Biblioteca, busca de QR por todo o centro con itinerarios marcados, planos perfectamente sinalados e indicacións gráficas, e recollida de elementos numéricos para cambiar na Biblioteca por pezas para, entre toda a clase e como remate das actividades, crear a imaxe de BIT en formato quebracabezas. Unha celebración que se alongou varios días e que, non só estivo cheíña de sorpresas e emoción, senón tamén de formación, aventura e diversión.

• Chega o Samaín ao Nº2 de Tui! Este ano celebrouse un Samaín cheo de maxia. Dende o Equipo de Dinamización da Lingua Galega organizouse unha actividade co obxectivo de que toda a comunidade educativa coñecera diferentes personaxes típicos da Galicia máxica e as lendas e mitos relacionados con eles.

Para lograr este obxectivo, durante o mes de outubro, cada clase dedicou un pouquiño de cada xornada a ler e investigar sobre os diferentes personaxes propostos: as meigas, os trasnos, o gatipedro, as mouras e os mouros, as maruxainas, os biosbardos e a coca. Grazas a todo o aprendido, cada alumno e alumna deu renda solta a súa imaxinación e creatividade para plasmar nun debuxo a súa propia interpretación destas personaxes.

Finalmente, tras coñecer todos estes seres máxicos chegou o momento de levar a cabo a segunda parte da actividade, que consistiu nun concurso de portas terroríficas: Cada clase tivo que escoller aquel personaxe que máis lles gustara e crear un deseño para decorar a porta da aula inspirado nese.

O día de Samaín, 31 de outubro, o ANPA sorprendeunos coa decoración de todo o centro, tanto a entrada, como toda a baixada e o interior do centro, estaba ambientado con temática de Samaín.

Durante a xornada, cada clase tivo a oportunidade de facer unha ruta por todas as portas, para poder apreciar as creacións de todo o cole, e de paso, recordar os diferentes personaxes. Algunhas portas invitábanche a entrar a coñecer a lenda que escondían, outras foron tan terroríficas que asustaban a todas aquelas persoas que pasaban polo seu lado. Pero todas elas estiveron cheas de creatividade e aprendizaxe.

Ademais, este día non podía faltar a tradicional cuchipanda, unha merendola que neste caso tivo temática monstruosa.

Non debemos esquecer que este curso levamos a cabo o proxecto Diver-xente, que pretende dar continuidade ao proxecto do curso pasado, para seguir aprendendo sobre os Obxectivos de Desenvolvemento Sostible. Neste caso, procuramos que as merendas da cuchipanda foran saudables e xerasen a menor cantidade de residuos posible, para contribuír co ODS 3: saúde e benestar, co ODS 12: Producción e consumo responsable e o ODS 13: acción polo clima.

Con todo, achegamos ao alumnado esta festividade tradicional de  Galicia, ampliando seus coñecementos sobre a cultura galega e todo isto integrado no proxecto do centro Diver-Xente

Durante o proceso destas actividades realizadas no mes de outubro desde os diferentes equipos contribuímos a consecución do ODS 4: educación de calidade, e de maneira transversal, no día a día do cole traballamos no ODS 5: igualdade de xénero.

• Xornada de Formación para as familias e profesorado: “Educar en igualdade de Xénero. A importancia dunha Educación sexual en calidade”. Terá lugar o vindeiro 14 de novembro de 2023, de 16:30-18:30h no salón de actos do centro, coa pedagoga e sexóloga Erea Devesa.  Está destinada a familias, profesorado e aberta a todas aquelas persoas que queiran participar de tod@s os centros educativos e contorna. O CEIP Nº2  aposta dentro do proxecto diverxente, para dar resposta aos ODS da axenda 2030, neste caso: ODS 5: Igualdade de xénero, ODS 4 Educación de Calidade e ODS 3: Saúde e benestar. Agardamos a vosa presenza e participación nesta xornada educativo-formativa por unha a comunidade educativa unida.

Iremos dando conta das vindeiras actividades que se levarán a cabo ao longo do mes de novembro e decembro, coas que nos agardan grandes sorpresas.